Diluns que ven, la cadena francesa France 3 difusarà l’episòdi n° 2421 de la sèria Mai polida la vida (Plus belle la vie / PBLV), una produccion del grop Telfrance. Dempuèi gaireben 10 ans, aqueste fuelheton, que passa cada jorn a 20h15, seguís la vida d’un quartièr imaginari de Marselha, lo Mistral, a travèrs de las peripècias d’un quinzenat de personatges principals e d’un bon centenat de personatges segondaris.
 
Una caracteristica tipica de Mai polida la vida es que lo jorn de difusion correspond al jorn de l’accion de l’episòdi. La pichòta societat “mistraliana” se vòl èsser una representacion idealizada de la societat francesa. Los scenaristas an bastit lo fulheton sul principi d’una trama principala, la de l’evolucion dels personatges dins lor vida, e d’unas intrigas annèxas, d’una durada de mai o mens dos meses, que tenon per tòca de renovelar l’istòria.
 
Malgrat que l’accion se passe a Marselha, se pòt pas dire que se sentís un ambient cultural occitan, malgrat que lo personatge central, lo proprietari del bar Roland Marci, siá jogat per l’actor occitanofòn Miquèu Còrdas (Lo Miralhet de Max Roqueta).
 
L’istorian e politològ francés Jean-Yves Le Naour, conegut pel sieu estudi sus l’occitanofobia francesa pendent la guèrra de 1914-1918, a estudiat aqueste fulheton dins son libre Mai polida la vida - La bóstia de las istòrias. Amb menimositat, fa a l’encòp òbra d’istorian del present e de sociològ per analisar aqueste succès televisual que, dempuèi d’annadas, recampa cada ser 2,5 milions d’occitans davant los televisors.
 
Le Naour fa un estat dels lòcs del fulheton e ne dona una interpretacion scientifica. S’interèssa als scenaris, tant dins lor realisme coma dins lors incoeréncias, a la produccion, als actors e a unes tèmas que soventejan, en particular, l’omosexualitat, lo racisme, l’islam, la convivéncia, lo caumatge. Se clina tanben devèrs l’univèrs PBLV: los fans, las publicitats integradas, las retombadas financièras, los ligams amb lo mond politic, la dimension industriala d’aquesta produccion, etc.
 
Al corrent de las annadas, Mai polida la vida es vengut un fenomèn social e a aqueste títol es aimat mas tanben es sovent criticat e mespresat. Le Naour explica que lo fulheton es a l’encòp un miralh de la societat, e en consequéncia portaire de contradiccions, senon qu’es tanben un davancièr e un fargaire d’opinion dins mai d’una question societala. Segon el, PBLV es un canal de la “republica dels bons sentiments”

Qu’òm aime o pas, cal reconéisser qu’en defòra de l’aspècte artistic, PBLV es vengut un tèma toristic de la ciutat de Marselha. S’estima qu’unes 100 000 toristas visitan la vila en rason de lor atrait per la sèria e que cada jorn fins a 1500 personas visitan la botiga de produits derivats. Los filmatges son faits dins los estudis de la Bèla de Mai a Marselha. Lo budget de cada episòdi es d’85 000 èuros. Se pòt aisidament comprendre l’impacte economic francés e local de la sèria.
 
Per comprendre l’univèrs del Mistral, rendètz-vos sus la cadena France 3 cada ser de diluns a divendres e/o dins lo libre de Jean-Yves Le Naour.
 
 
 
 
Terric Lausa
 
 
 
 
_____
LE NAOUR, Jean-Yves. Plus Belle La Vie - La boîte à histoire. Edicions PUF, 2013. 208 paginas. 12 èuros.