Dissabte 25 de genèr, a la Maison Comuna de L’Isla de Baish (Savés), a l’iniciativa de Bastir-Gasconha Tolosana, se debanèc ua amassada publica d’informacion deu movement Bastir (èx-Manifèst Occitanista), damb nombroses membres de l’enquadrement (“comitat de pilotatge”) d’aqueth movement: de prumèr le fondador Dàvid Grosclaude, conselhèr regionau d’Aquitània (Partit Occitan); Guilhèm Latrubesse, conselhèr regionau de Mieijorn-Pirenèus (Partit Occitan); Joan-Luc Davezac (delegat de Bastir a L’Isla de Baish); e Geors Nosella (comitat de pilotatge Bastir-Gers). Convidats e tanben presents a la tribuna: Nicolau Rei-Bèthvéder, sòci de Bastir de la lista Alternativa ende Sent Lis, damb les dus cofondadors de l’Amassada Ecociutadana 32, Alèxis Boudaud d’Aush e Melania Bourgeois de L’Isla de Baish.
 
Le representant locau, Joan-Luc Davezac, draubiscoc donc la session en rectifiar au passatge quauquas cracas escriutas dins la premsa locala. Le Dàvid Grosclaude e le Guilhèm Latrubesse evoquèren donc les punts màgers deu projècte Bastir, plan solide a prepaus de las escadenças de gahar entà reviscolar localament la lenga e la cultura occitanas, en tornar díser au passatge que si Bastir non ei pas un partit politic, pr’aquò la recuperacion de l’identitat autoctòna passa forçadament per la casa decisionària e que totas las bonas volontats ciutadanas localas dins aqueste esperit seràn a un moment dat sosmetudas a l’aprobacion d’elegits, e que donc, d’aqueth punt de vista, qu’ei imperatiu que les actors locaus s’impliquen dirèctament dins la vita politica de las loas comunas respectivas se vòlen un dia véser les projèctes capitar. Qu’ei per’mor d’aquò e en rason de las escadenças electoralas imminentas que’s parla d’ara enlà puslèu de “Bastir-municipalas 2014” (e au passatge, l’anonci deu sosteng evident deu movement entau Joan-Luc Davezac per’mor deu hèit qu’aqueste demandèc precisament l’investidura “Bastir-municipalas 2014”).
 
La basa de tribalh de Bastir qu’ei consensuala “au minimum”, valabla entà Occitània sancèra, e se pòt adobar localament a totes les parçans, segon las oportunitats...
 
Joan-Luc Davezac expliquèc que d’aqueth punt, justament, L’Isla de Baish ei ua ciutat occitana modèl per’mor que i a avut dempús detzenats d’annadas un tribalh pregond de realizat, que naturalament les ciutadans e les elegits de L’Isla an tribalhat amassa entà conservar l’identitat occitana locala vertadèra en desdramatizar le sicut, en díser que “l’identitat occitana ei quauquarren de collectiu”, non ei pas brica un daquòs sectari; au contrari qu’ei ua identitat d’adopcion, de dubertura a l’aute, e qu’ei per’mor d’aquò que la cau mostrar le mès possible, que cadun s’i posca banhar dihens e atau l’adoptar d’un biaish le mès naturau possible, que sia en l’aprénguer damb corses de lenga, en la véser per carrèras, o d’un biaish mès hestiu per accions culturalas localas pendent las quaus la lenga occitana sia plan presenta. Las associacions de L’Isla (Escota e Minja, Carnaval Gascon, Canta L’Isla...), an aqueth nivèu, que hèn un crane tribalh!
 
E i a urgéncia! Per’mor que coma ça ditz le referent Bastir de la ciutat vesina de Sent Lis, Nicolau Rei-Bèthvéder, la desoccitanizacion de la nòsta societat qu’ei prigondament ligada a l’evolucion deu biaish de víver, de l’urbanisme, e per’mor de rasons societaus mès generaus qui hèn que la presa de consciéncia e l’adopcion de l’identitat locala vertadèra non son pas quauquarren d’espontanèu! En citar le cas de la sua ciutat, l’espandiment de la banlèga mondina hè auei deus bordalats de Sent Lis un padoenc-dromidor nèutre e anonim.
 
D’un biaish generau, la màger part deu programa de Bastir a prepaus de la gestion de l’adobament deu territòri, en respectar le hilat sociau e l’environament, estoc represa e mès estudiada peus sòcis de l’Amassada Ecociutadana 32, representats aquí pendent aquera serada peus dus cofondadors, Melania Bourgeois e Alèxis Boudaud, qui, de sigur, per’mor de la tematica de l’amassada, evoquèren puslèu las rasons qui hasquèren qu’avoren idèa d’aderir a Bastir, que le programa non se resumís pas, de sigur, a la sola dimension environamentala. Las loas adesions a Bastir, qu’ei en rason que les sòcis combaten auei sonque entà las loas idèas comunas, en dehòra de la tròp tradicionala particion dreta contra esquèrra qui amaga les vertadèrs enjòcs de la politica ciutadana actuala, en mès d’aquò, en prénguer en consideracion las soscadissas de la basa.
 
L’amassada s’acabèc per un Se Canta magistrau, alavetz seguit per un aperitiu amistós pendent le quau le monde damb les sòcis de Bastir contunhèren de discutir mès pregondament deus sicuts evocats.



Jeròni Picas