Es tot un trabalh de capitar de rendre compte dels Total festum amb totas las manifestacions ramosadas sus tres setmanas. Per Aude, coma pels 4 autres departaments de Lengadòc-Rosselhon, traparetz totas las entresenhas (o gaireben) sul site de la Region dins aquela lenga bastarda demandada pels servicis de comunicacion: una mescla sens chuc ni muc de francimand e d’occitan.
Lo Menerbés del sud a dobèrt lo talh per aquela primièra dimenjada de junh amb los concèrts e balètis amb Coriandre, Tafanari e Bric-a-Drac a Mirapeisset. Una jornada pels mainatges se tendrà lo divendres 15 de junh a Bisan e Claudi Alranq jogarà (es plan lo mot) son Rugby-Club-Village lo dimenge 24 a Posòls.
A Pepius, autra comuna de Menerbés, lo Total Festum se tendrà sus una jornada: lo dissabte 9 amb de contes (Elena Bardot en passejada lo matin; Alan Roch de vèspre), concèrt e balèti menats pel Cristian Almerge.
En Pèmont d’Alaric, la Comunautat de comunas a causit de faire virar las animacions d’un vilatge l’autre: bodega amb la Sòfia a Dozens (dissabte 6), talhièr-cosina a Campendut (dimenge 10), concèrt de du Bartàs a Campendut (divendres 15), una virada musicala de cavas en cavas a Dozens (divendres 22), un balèti amb Fial de Lana a Badens (dissabte 23) e la regalada finala a Sant-Cucufat (dissabte 23).
Meteis esquèma en Val de Danha amb una dobertura dançarèla a La Bastida amb Los Romegaires (dissabte 9), las Bestiòlas de la Garriga a Taurisan (dimars 12), una serada-cabaret amb l’umorista Clamenç e lo grop vocal.
Aqueles a Serviés (divendres 15), una jornada pels escolans a Montlaur (dimars 19) e lo final a Montlaur tanben amb la Fanfara Toto e Sèm de Caors (dissabte 23).
En Lauragués, la literatura es mesa en abans a Castèlnòu d’Arri, Vilapinta e Fendelha (del 8 al 10) amb la redescobèrta dels escrits d’August Forés e de Prospèr Estiu.
A Sant Miquèl de Lanés, lo dissabte 23, caminada e animacions, rire amb Padena prepararàn a la taulejada (caçolet, de segur!) e a una brava serada amb La Mal-Cofada e Moussu T.
D’aquel temps, Laurac (dissatbe 23 e dimenge 24) celebrarà los mestièrs vièlhs e los contaires. A Grussan, se dançarà lo divendres 15, se veirà l’espectacle sul rugbí d’Alranq lo divendres 22 e se farà d’animacions a l’entorn del fuòc lo dissabte 23.
A Narbona, la poesia occitana serà a l’onor (divendres 15), se tendrà conferéncia e s’escotarà grop vocal (dimècres 20), se farà un torn de balèti amb Biscam pas a Narbona-Platja (divendres 22) abans lo grand final lo dissabte 23 qu’i prendràn part Tonton.
A Faim, L’Art à tatouille e Castanha e Vinovèl. La causida es pas totjorn aisida de faire per las sortidas de junh, mas cal que las belugas dels fuòcs de sant-Joan contunhen de balhar vam a la vida occitana long de l’annada.
Alan Roch
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
I a pas cap de comentari
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari