Qu’arriben aué en Aran es Deputats deth Parlament de Catalonha membres deth Rapòrt Conjunt entà impulsar era naua Lei d’Aran. Segons çò que rapòrte eth Conselh Generau d’Aran, que trebalharàn aué e deman ena ostaleria Sol Vielha, entà bastir ua naua lei que definisque encara mielhor er encaish d’Aran en Catalonha.
 
Aquera naua lei entà definir er autogovèrn deth país occitan en Catalonha e, mès que mès, entà melhorar e méter a jorn era lei aprovada en 1990, se prepausèc ja en 2009, quan toti es grops politics deth país occitan e liurèren ath govèrn de Catalonha ua propòsta. Eth 10 de mai d’este an passat, eth Parlament catalan s’engatgèc d’amiar-la a tèrme en aguesta legislatura e tanben a deféner “era indentitat nacionau d’Aran e era lengua occitana dauant dera intransigéncia deth govèrn espanhòu”.
 
Aguesta dimenjada, es deputats que trabalhen ja sus un document fòrça ambiciós qu’es politicians aranesi e defenen.
 
Entàs 17h eth Sindic d’Aran, Carlos Barrera, e eth deputat aranés ath Parlament de Catalonha e baile de Vielha, Àlex Moga, qu’atieràn as mieis de comunicacion.
 
Tre que s’aprovèc era lei d’Aran de 1990, era lengua occitana qu’ei venguda oficiau en Catalonha tota, er occitan qu’ei lengua preferenciau en Aran e lengua veïculara ena educacion, e ath delà er Institut d’Estudis Aranesi que ven acadèmia dera lengua. Per contra, b’ei evident que cau un esturment politic e ues mesures financères entà que totes aqueres arreconeishences e se poguen hèr evidentes ena vida vidanta, e era occitanitat d’Aran e vengue normau per mejan deth sòn autogovèrn e dera volentat des aranesi.
 
 
 
 
Ferriòl Macip