Las nòrmas que Segolène Royal vòl que regiscan los burèus del Ministèri de l’Ecologia, qu’ara ela dirigís, son pas passadas inapercebudas. Lo setmanièr Le Point ne publiquèt una informacion exclusiva.

Le Point ditz que la “Dòna de Fèrre” de Peitau se desplaçarà dins los corredors del ministèri precedida d’un uissièr que l’anonciarà, de tal biais que lo personal se deurà levar a son passatge, segon las declaracions del personal de l’Hôtel de Roquelaure (“l’Ostal de Ròcalaura”) de París, ont i a la sedença ministeriala.
 
E mai, encara segon lo personal, Royal a enebit que se fume al jardin e dins la cort en sa preséncia. Vòl pas tanpauc que los membres del sieu gabinet demòren al corredor quand ela dinnarà, per “evitar de perturbacions sonòras”.
 
Le Point rapòrta tanben que Royal a mes en plaça lo “co-working”, es a dire, que pas cap de burèu deu èsser ocupat per una sola persona, en defòra del sieu. Devon èsser almens doas personas dins cada burèu. Aquela nòrma s’aplica tanben a Jean-Louis Bianco, son conselhièr especial, que deu partejar son burèu amb son encargat de mission.
 
I a tanben una darrièra règla un pauc curiosa: la ministra a reglamentat la permission de dormir dins la cabana de l’ostal particular qu’assosta los oficièrs de seguretat o los menaires de veituras. Alavetz, lo menaire de Frédéric Cuvillier, lo secretari d’estat dels transpòrts, a pas drech d’i passar la nuèch, se Cuvillier es absent de París. “Aquela interdiccion a pas gaire de sens, lo menaire de Cuvillier demòra a Boulogne… Alavetz se cal desplaçar mai quand cal anar quèrre Cuvillier a l’aeropòrt”, çò explicavan a Le Point de personal d’intendéncia de l’Hôtel de Roquelaure.
 
De totas aquelas informacions publicadas, Ségolène Royal ne desmentiguèt una: la que disiá que la ministra aviá enebit los descoletats dins son ministèri. Royal publiquèt sus son Twitter: “Desmentissi plan segur la rumor ridicula tocant l’interdiccion de descoletats dins lo ministèri”. De mai, la ministra apondiá que “la sola instruccion donada concernís la mai granda rigor dins l’utilizacion dels fonzes publics, çò que los franceses espèran de nosautres”.

Je démens bien sûr la rumeur ridicule concernant l'interdiction de décolletés dans le ministère !

— Ségolène Royal (@RoyalSegolene) April 24, 2014

La seule instruction donnée concerne la plus grande rigueur dans l'utilisation des fonds publics, ce que les Français attendent de nous.

— Ségolène Royal (@RoyalSegolene) April 24, 2014