Un grop de militants de l’organizacion independentista Alternativa Nacionalista Canària (ANC) desembarquèt diluns passat sus las Illas Salvatjas en una protèsta simbolica contra las prospeccions petrolièras dins la zòna e per revendicar la sobeiranetat sus l’archipèla. Las illas, que son inabitadas, se tròban entre Madèira e las Illas Canàrias. Administrativament fan partida de Portugal, e mai s’Espanha, de temps en temps, las reclama.
 
L’ANC expliquèt que l’accion cèrca pas de dobrir cap de conflicte amb Portugal. Vòlon sensibilizar aquel país sul problèma de las prospeccions petrolièras. Cossí que siá, Portugal i a ja mandat un vaissèl de l’armada.
 
De fach, las Illas Canàrias son en crisi institucionala amb l’estat espanhòl a causa d’aquelas prospeccions petrolièras que l’estat las vòl menar a tèrme e que lo govèrn autonòm de l’archipèla ne vòl pas. Lo president Paulino Rivero anoncièt la convocacion d’un referendum per la tardor per que los canaris exprimiguèsson lor vejaire a prepaus d’aquelas prospeccions. E qualifiquèt la situacion actuala de “divòrci” entre las Canàrias e l’estat espanhòl.