Grècia vòta uèi dins una eleccion legislativa fòrça importanta. Al mitan de la legislatura, aquel vòte avançat poiriá menar al poder Syriza, lo partit de l’esquèrra radicala, amb son lidèr Alexis Tsipras. Dins las eleccions passadas, l’Union Europèa se mobilizèt contra aquel partit amb una intensitat granda. Ara, e mai se l’union menaça encara los grècs amb las consequéncias d’una victòria d’Alexis Tsipras, los messatges son fòrça mai doces e la paur es gaireben inexistenta, segon çò que rapòrta Vilaweb.
 
De son costat, Syriza a moderat fòrça son discors e, de fach, parla pas mai de prene de decisions unilateralas sus l’èuro ni sus l’economia grèga. Cèrca puslèu d’acòrdis amb Euròpa per cambiar los efièches nocius de la politica d’austeritat. E dins l’Union Europèa, fòrça mond creson que cal ensajar de reorientar la situacion del país a travèrs de Syriza. Los mercats semblan calmats e agachan l’eleccion de Grècia d’un biais fòrça tranquil, per rapòrt a fa dos ans e mièg. Lo jornalista catalan Vicent Partal explica dins El Punt-Avui TV que los mercats reagisson amb moderacion, e mai se lo cambiament serà radical dins la politica grèga en cas de victòria de Syriza.
 
 
Un còp antisyriza? 500 000 desplaçats e 100 000 joves poiràn pas votar
 
D’un autre costat, avèm legit sul jornal espanhòl El Confidencial que l’inflexible sistèma de vòte daissarà de milièrs de grècs emigrats, e d’estudiants a l’estange, sens lo drech d’elegir los governants del país. Las personas amb drech de votar que demòran fòra lor circonscripcion electorala an pas la possibilitat de votar a distància e son obligatdas de se desplaçar. Lo mond que vòtan en Atenas pòdon prene un avion, mas los d’endacòm mai devon apondre un viatge en tren, autobús o vaissèl. Aquò fa que los emigrats an besonh de qualques jorns de comjat per poder anar votar.
 
Las associacions d’expatriats calculan que seràn aperaquí 500 000 los ciutadans que votaràn pas, çò es lo 7 o lo 8% del cens electoral. Es una chifra importanta, pr’amor que segon los sondatges, Syriza es a tres o quatre ponches de diferéncia del partit conservator Nòva Democracia.
 
 
D’eleccions a la lèsta qu’excluson aperaquí 100 000 joves
 
Los emigrats son pas los sols que se planhon. La precipitacion de la convocacion de l’eleccion empedirà de votar fòrça joves nascuts en 1997. E mai s’an ja 18 ans, lo cens electoral s’actualiza en febrièr, çò rapòrta encara El Confidencial.
 
Cal una accion especiala del Ministèri de l’Interior per permetre a aqueles joves de votar. Lo defensor del pòble ne faguèt la demanda a las autoritats mas foguèt pas escotat.
 
Lo resultat es qu’aquel sector critic de la populacion, que protèsta activament per carrièras, poirà pas votar. Dins un dels memes que mai circulan per Internet, se pòt veire un jove que pausa una question al primièr ministre grèc, lo conservator Antonis Samaras: “Perqué podèm pas votar?”, e lo primièr ministre li respond: “Perque votariatz Syriza”.
 
Dins la darrièra eleccion al Parlament Europèu, Syriza aviá ganhat per un marge mens larg que çò que s’esperava. En aquel vòte d’ailà, lo 40% dels joves entre 18 e 24 ans avián votat per lo partit de l’esquerra radicala e sonque lo 10% aviá votat per los conservators de Nòva Democracia.
 
Grècia subís un envielhiment de la populacion mai accentuat que dins la rèsta de l’Union Europèa. La populacion a la retirada es mai importanta que la jove. Mas aqueles joves reclaman a Samaras lo drech de poder elegir.