L’organizacion europèa, qu’agropa de govèrns e d’entitats de la societat civila, vòl que Brussèlas assumisca que las lengas non estatalas son d’actors economics e culturals. Las demandas se basan sus una resolucion de 2013 del Parlament Europèu. Lo ret impulsarà lo Fuèlh de Rota per la Diversitat Lingüistica dins los meses venents.

Totas las lengas non estatalas, se son oficialas dins qualque territòri de l’UE, deurián tanben èsser declaradas oficialas per las institucions comunautàrias. Es una de las demandas principalas del Fuèlh de Rota per la Diversitat Lingüistica, que lo Ret per la Promocion de la Diversitat Lingüistica (NPLD, sigla en anglés) presentèt al començament de febrièr al Parlament Europèu.
 
La mesura beneficiariá als parlants de lengas coma lo catalan, lo basco, lo galèc, lo galés... e tanben l’occitan... Se tracta de lengas qu’an pas d’oficialitat al nivèl estatal, mas si que n’an dins qualque partida de lors territòris lingüistics. L’occitan i seriá mercés al fach qu’es oficial en Aran e en Catalonha.
 
Lo fuèlh de rota de la NPLD demanda tanben que l’UE encoratge l’usatge de totas las lengas europèas —e pas solament de las dels estats—, que trabalhe per garentir lo compliment de la Carta Europèa de las Lengas Regionalas o Minoritàrias e qu’assumisca que las lengas non estatalas son d’actors importants pel desvolopament economic e cultural de l’UE.
 
La proposicion, segon l’NPLD, se basa sus la resolucion sus las lengas menaçadas que lo Parlament Europèu l’aprovèt en setembre de 2013. La mocion reclamava a las autoritats de l’UE e als estats membres de començar d’accions seriosas en favor de las lengas minorizadas del continent.
 
 
Procès de contribucions
 
Aquela presentacion marquèt lo començament d’un procès dobèrt de contribucions e discussions sus lo fuèlh de rota. L’NPLD vòl que, “durant los meses venents”, lo fuèlh de rota desboque vèrs la “vision de naut nivèl d’una Euròpa multilingüa e lingüisticament divèrsa”. Lo ret ditz qu’aquò es tot plen compatible amb lo lèma de l’UE: “Units dins la diversitat”.
 
Lo ret es format per de govèrns e d’entitats de la societat civila. En lo cas dels govèrns, i son presents los de Catalonha, Galícia, lo Bascoat, Frisa, Galas, Navarra, Irlanda, Trentin, Bretanha, Friol-Venècia Júlia e lo Parlament Suedés de Finlàndia.

---

Aqueste article es adaptat de Nationalia amb qui Jornalet a un acòrdi de cooperacion.