Lo 20 de març que ven donarem la benvenguda a la prima amb un eclipisi parcial de Solelh que se poirà veire en Occitània tota. L’eclipsi se passarà entre 9h10 e 11h30, amb un maxim de sornura a 10h15 aperaquí, quand la luna cobrirà lo 70% del disc solar. Poirem remarcar que la lutz del solelh perdrà un pauc de fòrça.
 
Aquel còp serà complicat pels que voldrián viatjar als endreches ont l’eclipsi se veirà total, ja que la lista de la planeta que demorarà completament escura serà sus mar, al nòrd de l’Ocean Atlantic, entre Islàndia, Escòcia, lo Cap Nòrd e Groenlàndia.
 


 
 
 
Cal pas agachar lo Solelh dirèctament
 
Lo Solelh se pòt pas agachar dirèctament, e mai se l’eclipsi es parcial. Los damatges qu’aquò poiriá provocar suls uèlhs serián irreversibles. Se pòt pas tanpauc espiar amb de lunetas de solelh, ni amb de radiografias. Per regardar dirèctament cal una bona proteccion de la lutz solara coma las qu’emplegan los soudaires. Un biais indirècte d’agachar l’eclipsi es de projectar l’imatge del Solelh a travèrs d’un telescòpi sus un fuèlh; aquí se pòt veire ben qu’al Solelh li manca un grand tròç.
 
Après aquel eclipsi, caldrà esperar fins al 21 d’agost de 2017 per ne veire un de fòrça parcial. Pr’aquò, pus luènh dins lo futur, lo 12 d’agost de 2026, i aurà un eclipsi que sa zòna de sornura totala serà fòrça près d’Occitània: al Bascoat, en Aragon, en Catalonha e a las Illas Balearas.