Vesèm uèi en Occitània, entre 9h e 11h30, un eclipsi parcial de Solelh, qu’a 10h15 la luna i cobrís lo 70% del Solelh. Aqueste còp l’eclipsi solament se vei total a las Illas Feròe e a l’archipèla d’Svalbard, un dels territòris abitats mai al nòrd del Mond. Cal prene en compte que sèm en una epòca de plena activitat solara, çò que dona als toristas dels dos archipèlas la possibilitat de veire d’espectaclosas auròras borealas.
 
 
8000 toristas, 500 plaças d’ostalariá
 
“Aperaquí 8000 toristas se lòtjan dins las Illas Feròe per l’eclipsi, e vesèm aquò coma una granda oportunitat per metre de relèu la cultura feroesa”, çò diguèt als mèdias Gudrid Højgaard, director del torisme de las Illas Feròe. Aquela quantitat de toristas despassa largament lo nombre de lotjaments disponibles dins las ostalariás del país, qu’es d’aperaquí 500, “mas la populacion locala es estada fòrça dispausada a collaborar, e mantes an logat lors ostals per lotjar l’afluéncia massissa”, çò apondèt Højgaard.
 
 
De mercandejatge e un festenal
 
Las institucions feroesas an profechat de l’eveniment per organizar d’animacions dins totas las vilas de l’archipèla: d’exposicions, d’eveniments gastronomics, de celebracions, de concèrts e quitament un festenal nomenat Viking Solar Eclipse Festival. Tanben s’es facha una edicion especiala de sagèls postals; los dessenhaires locals an creat d’objèctes per l’ocasion; e mai s’es facha una edicion limitada de la bièrra locala.
 
 
Una legenda locala
 
Segon una legenda locala, fa qualques sègles quatre fraires coratjoses de la vila de Sumba, a l’extrèm sud de l’archipèla, chepicavan totes los feroeses a causa de lors batèstas constantas. Un jorn, los fraires, qu’èran pastors, passejavan lors fedas per las montanhas e còp sec se faguèt una sornura totala. Espantats e mòrts de paur, prometèron que se subrevivián se tornarián pas pus batre. Quand lo solelh apareguèt, los fraires s’abracèron e jamai pus se tornèron pelejar.
 
Se crei qu’aquesta legenda es un remembre de l’eclipsi total de Solelh que se passèt a 11h25 lo 30 de mai de 1612.
 
 
L’eclipsi en Occitània
 
En cò nòstre l’eclipsi se passa entre 9h10 e 11h30, amb un maxim de sornura a 10h15 aperaquí, quand la luna cobrirà lo 70% del disc solar. Poirem remarcar que la lutz del solelh perdrà un pauc de fòrça.

 
 
 
 
 
Cal pas agachar lo Solelh dirèctament
 
Lo Solelh se pòt pas agachar dirèctament, e mai se l’eclipsi es parcial. Los damatges qu’aquò poiriá provocar suls uèlhs serián irreversibles. Se pòt pas tanpauc espiar amb de lunetas de solelh, ni amb de radiografias. Per regardar dirèctament cal una bona proteccion de la lutz solara coma las qu’emplegan los soudaires. Un biais indirècte d’agachar l’eclipsi es de projectar l’imatge del Solelh a travèrs d’un telescòpi sus un fuèlh; aquí se pòt veire ben qu’al Solelh li manca un grand tròç.
 
Après aquel eclipsi, caldrà esperar fins al 21 d’agost de 2017 per ne veire un de fòrça parcial. Pr’aquò, pus luènh dins lo futur, lo 12 d’agost de 2026, i aurà un eclipsi que sa zòna de sornura totala serà fòrça près d’Occitània: al Bascoat, en Aragon, en Catalonha e a las Illas Balearas.