Las armadas d’un desenat de païses, comandats per l’Arabia Saudita, an atacat la milícia shiita dels huthis en Iemèn. Aquela milícia, tanben coneguda coma Ansar Allah (los Partisans de Dieu) a lo sosten d’Iran e dins los darrièrs meses aviá capitat a contrarotlar una granda extension del país. Participan als bombardaments cinc païses del Conselh de Cooperacion del Golf e mai Egipte, Marròc, Jordania, Sodan e Paquistan.
 
De lor costat, los Estats units an autorizat un sosten logistic a l’operacion aràbia contra los huthis. Los huthis considèran qu’aquesta agression es una declaracion de guèrra que pòt menar a una guèrra globala dins la region.
 
Lo Ministèri dels Afars Estrangièrs d’Iran a condemnat l’atac. La pòrtavotz del ministèri iranian, Mardiya Afkham, declarèt als mèdias qu’aquel atac es “perilhós e contra las leis e las nòrmas internacionalas”. “L’usatge de la fòrça militara en Iemèn aumentarà la complexitat de la crisi e metrà fin a las oportunitats d’una solucion pacifica per las disputas interioras de Iemèn”, çò apondèt.