Dempuèi aqueste divendres, anar en tren de Marselha a Londres es fòrça mai aisit e rapid que d’anar de la Ciutat Focèa a Lemòtges e quitament a Bordèu. Eurostar, lo tren jos la Marga, connècta dempuèi divendres passat Marselha e Avinhon cap a Londres.
 
Lo primièr tren de Londres en direccion Marselha partiguèt lo 1r de mai a 6h19 e en pauc mens de 6h30 arribèt a Marselha après s’arrestar a Lion e a Avinhon, segon çò que rapòrta France Info.
 
Eurostar a anonciat “fins a cinc servicis per setmana en plena sason” que connectaràn la capitala britanica e Provença, e “entre un e tres servicis la rèsta de l’annada”. L’entrepresa ferroviària se met a afrontar la concurréncia de la societat publica alemanda Deutsche Bahn, qu’a anonciat que vòl far córrer de trens dins lo tunèl jos la Marga. Pasmens, la concurréncia d’Eurostar es ja existenta amb los avions. De companhiás low cost ja connèctan Marselha e Londres.
 
Ça que la, la comuna de Marselha e los comerçants del centre vila se regaudisson d’aquela connexion que menarà de toristas al país. Segon Didier Parakian, adjonch al cònsol de Marselha en carga del desvolopament economic, son 200 000 los toristas britanics que cada annada vesitan normalament la capitala de Provença. Per tant, Parakian espèra que gràcias a l’Eurostar aquela chifra se doblarà. “Leis anglés aiman Marselha. La concurréncia serà fòrça positiva e atirarà mai de toristas. Una partida prendrà lo tren, una partida prendrà l’avion. Lei beneficis seràn per lei marselhés, per lei comerçants, per lei ostaliers, per lo centre vila”, çò espèra Parakian, qu’espèra quitament que se crearà d’emplecs.
 
Mentretant, l’estat francés a decidit de barrar 14 linhas de trens al país, coma Jornalet o denóncia ben uèi dins son editorial. E mai, las comunicacions en Occitània, que son elas que portarián un progrès economic, uman e social durable, demòran marridas. En comparason amb las 6h30 de Marselha-Londres, una liason Marselha-Bordèu o Marselha-Lemòtges nos demanda de far de correspondéncias dins un viatge longàs que despassa netament las uèch oras.