Los abitants del quartièr de Vauban de Marselha son mobilizats dempuèi la setmana passada  per s’opausar a un projècte immobilièr del promotor BDP Marignan, que cèrca de bastir sus un illòt tres immòbles de sèt estancis e cinc nivèus sosterranhs qu’aculhiriá 134 lotjaments. A l’ora d’ara, l’endrech es ocupat per tres magasins, un garatge e una estampariá.
 
“Siam dins una zòna de teissut urban omogenèu remarcable, amb de teulissas en teule e d’immòbles dau sègle XIX de tres estancis”, çò ditz a 20 Minutes un dels abitants mobilizats. Lo pòrtavotz del collectiu , nomenat Quinze Cent Quinze, denóncia tanben que “l’envergadura dau projècte es ges adaptada au quartier”. De mai, denóncian que lo projècte cambiariá radicalament lo païsatge urban d’aquel quartièr istoric, ara dominat per Nòstra Dòna de la Gàrdia, e tanben l’impacte sul trafec automobil e encara sul nombre d’enfants per escolarizar, ara que las escòlas son saturadas.
 
De son costat, lo cònsol del sector, Yves Moraine (UMP), ditz que “fau ben construir per restar atractiu”. De mai, justifica lo besonh del projècte en disent qu’aquel quartièr “es pas la plana de Crau, siam au còr d’un arredondiment de centre-vila”.
 
Lo permís de construir foguèt autrejat lo 3 d’abril passat. A pas escapat als abitants que foguèt desliurat après las eleccions departamentalas e en seguida d’un oportun cambiament d’afectacion de la parcèla, qu’en 2009 èra encara “reservada per d’esquipaments publics”.