Pel 14 de julh, fàcia al Hull FC, per aquela partida remesa en febrièr, los Dracs catalans avián causit de presentar un fuòc d’artifici al public de Brutús.
 
Atacavan a fons, mas es Hull que marcava en primièr. Un petarèl banhat, vist que Leon Pryce preniá a contra-pè la defensa anglesa per marcar, abans que Scòtt Dureau en tres grimaças trapèsse tanben lo camin d’un segond ensag. Las Aglas de mar dominavan un momenton, mas a la mièja-ora, Greenshields recuperava una pauma, corrissiá un setantenat de mètres. Se fasiá reprene, la pauma èra escartada e Millard puntava en cap de linha. Hull replicava per l’alièr Briscoe, mas Dureau interceptava dins sos 10 mètres e filava a l’ensag d’una corsa dreita e volontària. A la pausa, los Dracs menavan atal 22-8.
 
Tre la represa, lo dobertura Leon Pryce, plan en camba e en luciditat aqueste dissabte, mandava tornar Millard a l’ensag. Scott Dureau recuperava una novèla palma e, sul punt d’èsser agantat, servissiá son alièr Blanch que partissiá, crèsta al vent, direccion lo drapèl del canton per marcar. Hull FC repreniá un pauc de vam e los Dracs bufavan un momenton. L’alièr internacional anglés ne profitava per ziga-zaguejar dins la defensa catalana e puntar l’ensag.
 
Mas las dètz darrièras minutas vesián doas novèlas concretizacions dels catalans per l’arrièr Clint Greenshields: en primièr, a la recepcion d’un còp de pè dins l’esquina de la defensa de Scòtt Dureau, puèi al tèrme d’un moviment collectiu. Amb una marca de 44-14, los Dracs meton bravament lor calendièr a jorn.
 
Tornan prene atal la tresena plaça, dos punts davant St-Helens que recebon aqueste divendres 20 en serada (21h) a Brutús.
 
Autant dire, l’importància d’aquela partida pel classament final. Scòtt Dureau, autor de 20 punts (2 ensags e 6 transformacions) menèt de cap de mèstre la formacion catalana a aquesta victòria. Sens suspresa, foguèt designat coma òme de la partida. De notar la prestacion volontària e dinamica del jove pilar lesinhanés Julian Bosquet per sa primièra aparicion jol malhòt dels Dracs en Super-Liga. Remplacèt plan coma cal lo David Ferriòl pres per la patrolha contra Warrington per un placatge supausat naut e suspendut per doas partidas.
 
Aquesta dimenjada, èran tanben al programa las mièja-finalas de la Cup.
 
Dissabte, sus la pelena d’Huddersfield, al tèrme d’una partida enlevada ont se marquèron 12 ensages, los Rhinos de Leeds se qualifiquèron per Wembley en l’emportant sus Wigan: 39-28.
 
Dimenge, del costat de Salfòrd, los Lops de Warrignton validèron tanben sa bilheta per aquel rendètz-bèl, fixat al dissabte 25 d’agost, mercé a una victòria aisida contra Huddersfield: 33-6.
 
Saludarem la memòria de Martin Martin, mòrt la setmana passada: èra de la granda equipa de l’AS Carcassona a la Liberacion e prenguèt part a la virada en Australia de 1951. Que l’esperit dels peonièrs contunhe de noirir lo moviment tretzista catalan e occitan!
 
E acabarem amb aquela citacion del realizator Ken Loach en conclusion del supèrbe documentari suls rebèls del fotbòl, difusat per Arte: “Fàcia a una societat que sacraliza l’individú, los espòrts d’equipa mòstran la necessitat d’agir collectivament”.




Alan Roch