L’independéncia a ganhat dins las eleccions en Catalonha e Aran en un vòte fòrça especial, amb una participacion recòrd del 77,46% del recensament. L’eleccion al Parlament  autonòm es venguda un plebiscit sus l’independéncia del país. Es lo sol biais legal que s’es trobat per far lo referendum independentista que l’estat espanhòl permet pas.
 
An votat per l’independéncia lo 47,81% dels elegeires, del temps que lo 39,12% an votat per las formacions espanholistas. Los partits amb una posicion indefinida an obtengut lo 12,15% dels vòtes. Traduch en deputats, es una majoritat absoluda per la secession: 72 deputats independentistas, 52 unionistas e 11 indefinits.
 
Lo plebiscit en forma d’eleccions a obligat totes los partits de se definir sus la creacion d’un estat independent catalan. Lo blòc de l’“òc” es configurat per la coalicion nomenada “Amassa per l’Òc” qu’a ganhat clarament las elecions amb lo 39,60% dels vòtes e 62 deputats, e la la candidatura de la CUP-Crida Constituenta amb lo 8,21% dels vòtes e 10 deputats. Dins lo blòc del “non” i a las listas del PSC (amb lo 12,71% dels vòtes e 16 deputats), del PP (amb lo 8,50% de vòtes e 11 deputats) e de Ciutadans (amb lo 17,91% dels vòtes e 25 deputats). Ciutadans que ven la segonda fòrça del Parlament. Amb una posicion indefinida e amb d’elements dels dos blòcs, i a Union Democratica (amb lo 2,51% dels vòtes e pas cap de deputat) e la coalicion nomenada “Catalonha Si que se Pòt” (amb lo 8,91% dels vòtes e 11 deputats).
 
Après una campanha internacionalizada e caracterizada pel jòc brut, la reüssida de l’independentisme es clara. Amassa per l’Òc a ganhat las eleccions amb una larga majoritat. Ciutadans vendrà la segonda fòrça politica, seguida del PSC que se tendrà coma tresena fòrça.
 
Las doas fòrças independentistas an atench la majoritat absoluda clara. Amb aquel scenari lo Parlament de Catalonha e Aran deu començar de trabalhar per la proclamacion d’un nòu estat independent.
 
 
Majoritat espanholista en Aran
 
En Aran, la coalicion Amassa per l’Òc a ganhat amb gaireben lo 25% dels vòtes, seguida de Ciutadans amb gaireben lo 24%. Lo PSC a atench aperaquí lo 20%, lo PP mai del 12%, la CUP mai del 6%. Union Democratica e Catalonha Si que se Pòt an atench un pauc mai del 5%. En total lo vòte independentista a atench lo 31,05% dels vòtes del temps que lo vòte espanholista a atench lo 56,59%. Los partits indefinits an atench l’11,4%. I a lo 0,98% dels vòtes en blanc e lo 0,43% dels vòtes que son nuls. Javier Rivas de Ciutadans es lo sol deputat aranés qu’intrarà al Parlament de Catalonha, mas es segur que defendrà pas l’occitan. Mireia Boya de la CUP a pas capitat a intrar, e mai se la CUP a multiplicat per sièis son sosten en Aran.
 
 
E alavetz?
 
Ara, Amassa per l’Òc deurà avançar lo projècte de secession, previst dins son programa dins 18 de meses, en s’adaptant a la negociacion amb la CUP, que vòl la declaracion d’independéncia lèu-lèu. La CUP a la clau de la majoritat absoluda per ben capitar lo trencament amb Espanha e ensajarà de negociar sas politicas anticapitalistas.
 
Caldrà veire qual serà l’intervencion de las autoritats europèas dins los meses venents fàcia a l’intransigéncia de l’estat espanhòl, que davant aquel resultat electoral, emplegarà tota sa fòrça per empedir la secession.
 
 
L’independéncia sus Le Monde, Le Figaro e Libération 
 
La victòria dels parits independentistas en Catalonha a dobèrt las edicions numericas dels mèdias franceses Le Monde, Le Figaro e Libération.

---

Resultats oficials en occitan

De legir.La Setmana: Catalonha : Majoritat absoluda per l'independentisme al Parlament