L’Universitat de Pau e dels Païses d’Ador a decernit lo títol de doctor honoris causa a Evo Morales Ayma, president de l’Estat Plurinacional de Bolívia. Lo Conselh d’administracion de l’universitat bearnesa decidiguèt d’autrejar lo títol al president bolivian, a l’unanimitat, en soslinhant que “la politica deu president Evo Morales s’inscriu dens un anament continentau e equilibrat, que presica l’instauracion deu «buen vivir» [bon víver], l’equilibri ecologic e l’equitat sociala”. Lo dorsièr soslinha los resultats obtenguts per far recular las inegalitats, los esfòrces per la proteccion de “Pachamama” (la Maire Tèrra), e remarca la prioritat acordada als “servicis de basa”, als “bens comuns” e al plurilingüisme: trenta sièis lengas oficialas que totes los foncionaris ne devon conéisser almens doas.
 
“Es un omenatge a totes los movements socials que vòlon liberar los pòbles”, çò declarèt lo president Morales davant las personalitats, dont lo primièr cònsol centrista de Pau, François Bayrou, mas tanben davant lo conselhièr regional occitanista Dàvid Grosclaude e l’altermondialista José Bové. “Saludi José Bové, un fraire que coneguèri en 2002 a Pau ont aviam animat de debats”, çò remembrèt Morales, quand totes dos èran engatjats dins las luchas sindicalistas. “Dempuèi 2002, lo temps es passat e nos sèm organizats”, çò apondèt, en tot remembrar sa carrièra politica. “Es pas res d’èsser elegit, devèm oblidar totes los interèsses personals e nos consagrar al pòble”, çò precisèt.
 
A la sortida d’aquela ceremònia, Morales inaugurèt, al vilatge Emmaús de Lescar-Pau, la Plaça de l’Estat Plurinacional de Bolívia e la Casa Latinoamericana.
 
 
Grosclaude saluda las avançadas de Morales
 
Dàvid Grosclaude anonciava e saludava la vesita de Morales. “Qu’anarèi participar a la soa recepcion a l’Universitat de Pau e a Emmaús de Lescar. Que devèm saludar la preséncia d’aqueth òme qu’ei lo primèr president d’un estat d’America deu Sud gessit d’un pòble indigèna”, çò disiá l’elegit occitanista dins son blòg.
 
Al delà de “saludar sustot lo son trabalh e lo son engatjament a mei d’un nivèu”, coma los dreches sociaus, lo partiment de las ressorsas e la proteccion de la biodiversitat, Grosclaude soslinhava que “l’Estat Plurinacionau de Bolívia reconeish lo dreit a l’autonomia deus territòris e assegura la reconeishença oficiala de totas las lengas parladas suu territòri de l’estat”. Una reconeissença qu’existís pas en cò nòstre, ont quitament “vienèm de véser lo Senat arrefusar un tèxt basic coma la Carta Europèa de las Lengas, que podèm saunejar que los nòstes governants seràn capables d’espiar coma un exemple de çò que se hè en Bolívia en aqueths domenis”.
 
Morales deu rescontrar uèi lo president francés François Hollande.