Amb la fin de l’annada, lo Centre Regional dels Ensenhaires d’Occitan (CRÈO) de Miègjorn-Pirenèus se faguèt l’amassada generala a Tolosa, lo 21 de novembre passat. Lo nombre d’ensenhaires presents aumentèt significativament per rapòrt a l’an passat. Aquesta mobilizacion dels professionals de la lenga nòstra s’explica perque la reforma del collègi soslèva fòrça questions. Fàcia a las menaças, los ensenhaires d’òc de Miègjorn-Pirenèus vòlon despassar las polemicas e retrobar una unitat d’accion contra las atacas sornarudas que visan la lenga occitana.
 
Pèire Cambús, professor en Coseran, nos presentèt la lamentabla baissa de l’ofèrta de l’occitan en Arièja que perdèt una seccion bilingüa e un pòst d’animator en occitan. Lo CRÈO Miègjorn-Pirenèus foguèt pas pro reactiu en aquel cas.
 
Las crentas dels professors pòrtan tanben sus la reforma del collègi que deuriá èsser aplicada en setembre de 2016. Las autoritats semblan de dire que l’occitan serà pas tocat per la reforma. Las seccions bilingüas serián botadas en defòra del dispositiu de la reforma de Najat Bellaud-Belkacem. Per l’occitan opcional, es encara pro fosc malgrat que lo ministèri semble de nos dire que l’occitan opcional poiriá veire sa plaça afortida en tocant d’escolans nòus amb los ensenhaments practics interdisciplinaris (ÈPI). Los professors presents a l’AG vivon la mesa en aplicacion de la reforma dels ÈPIs coma un reculada. De caps d’establiment profièitan de l’imprecision per portar de patacadas a l’occitan. Lo CRÈO Miègjorn-Pirenèus demandarà d’urgéncia un rendètz-vos a la rectritz de Tolosa per aver una letra que confirma que l’occitan es pas tocat per la reforma per que los professors se’n pòscan servir fàcia als principals.
 
La remobilizacion dels professors del CRÈO Miègjorn-Pirenèus passa tanben per implicar mai de joves professors. Aquò demanda la participacion a de manifestacions visiblas coma las dictadas occitanas de genièr 2016 o d’autras manifestacions culturalas per la lenga. Totes foguèron d’acòrdi sus una regeneracion del CRÈO Miègjorn-Pirenèus, que deu passar per una preséncia mai importanta sul terren, sus Internet e cap als politics.
 
Aquel vam novèl se sentís amb l’arribada de personas novèlas dins un burèu alargat del CRÈO Miègjorn-Pirenèus: J.B. Courcelle serà secretari, B. Duranton clavaire, N. Rei Bèthvéder president. E. Barta intègra lo burèu pel privat, E. Isopet pel segond gra e O. Lamarque s’ocuparà del primièr gra.
 
Lo novèl president, Nicolau Rei Bèthvéder (professor al collègi de Murèth e al licèu de L’Isla de Baish) saludèt l’accion de l’ancian president, Pèire Escudèr, qu’ara trabalha a Bordèu, e de tota la còla del CRÈO Miègjorn-Pirenèus. Se mostrèt ofensiu en anonciant d’accions concretas coma sa participacion a la manifestacion de Peiriguers per l’occitan lo 28 de novembre, o a l’AG de la FÈLCO lo 5 de decembre. Tanben, vòl multiplicar los contactes amb la basa en passant per Facebook, e-mails e SMS e en ensajant de far venir de joves professors dins l’accion.
 
 
 
 
Olivièr Capòni