La setmana passada, lo Comitat per Protegir los Jornalistas (Comitee to Protect Journalists) liurèt a Nòva York son prèmi annual a la libertat de premsa. Los premiats d’ongan son lo paraguaian Cándido Figueredon, los blocaires etiòps de Zone 9, lo malaisian Zulkiflee Anwar Ulhaque e lo collectiu RBSS (Raqqa is Being Slaughtered Silently, Chaplan Raqq en Silenci), un grop de ciutadans jornalistas que documentan la dura vida dins un fèu de l’Estat Islamic, la vila siriana de Raqqa, ont lo mond subisson la terror de Daish e los bombardaments de las aviacions francesa e russa.
 
Dempuèi que lo grop jihadista a pres la vila, lo collectiu RBSS es practicament la sola font d’informacion independenta sus la vida vidanta e suls crimes que s’i comet. Los activistas, totjorn anonims per de rasons de seguretat, enregistran secretament los abuses a los assassinats de l’Estat Islamic dins la vila e las condicions dels ciutadans jos las estrictas leis impausadas pels jihadistas, e ara jos las bombas dels avions de las armadas russa e francesa.
 
Las informacions que la còla d’RBSS prenon sul terren se mandan, quand se pòt, als collaboradors a l’estrange, que las mandan sul pic als mèdias internacionals amb la tòca d’ofrir una vision alternativa a la propaganda de l’Estat Islamic.
 
Qualques membres d’aquel collectiu, qu'emplegan intensivament de rets socialas coma YouTube, Twitter e Facebook, an parlat recentament amb la BBC en seguida del prèmi.