L’UNÈSCO a declarat los brandons de la fèsta de Sant Joan que se debana en Comenge e en Aran coma Patrimòni Immaterial de l’Umanitat.
 
La canditadura nomenada “Fèstas del Fuòc del Solstici d’Estiu dels Pirenèus” es estada impulsada per Andòrra amb lo sosten dels estats espanhòl e francés. Es formada per 36 comunas d’Occitània (en Comenge e Aran), 14 del Principat de Catalonha, 9 d’Aragon e 3 d’Andòrra. Es aquel petit estat pirenenc qu’a mandat un representant a la reünion de l’UNÈSCO, qu’es a avalorar las divèrsas candidaturas pendent tota aquesta setmana. Son amassats en Namibia fins a divendres.
 
Aquela candidatura, que se presentèt en febrièr passat a l’UNÈSCO, a superat fins ara totas las fasas del procès de seleccion e lo comitat d’avaloracion a emés un rapòrt plan favorable, mai que mai per comptar amb lo sosten de tres estats e perque los collectius qu’organizan aquelas fèstas tradicionalas se i son fòrt engatjats.
 
 
Celebracions en Aran
 
Del las 36 comunas occitanas, doas son en Aran: Arties e Les, e Les que festeja uèi aquela nominacion. A 19h30 las campanas de la glèisa sonaràn e a 19h45 se projectarà sus la Plaça deth Haro eth treilèr de presentacion de la candidatura a l’UNÈSCO e del moment de la nominacion coma Patrimòni Immaterial de l’Umanitat. A 20h se cremarà las falhas e se dançarà de danças tradicionalas e se clavarà amb l’imne nacional occitan. S’ofrirà de vin caud e de chocolat.
 
E mai, del 5 al 8 de decembre, l’ostal de la comuna de Les aculhirà l’exposicion Hèstes deth Huec.
 
A Barcelona, lo Musèu d’Istòria de Catalonha aculhirà a partir de divendres una exposicion sus las Fèstas del Fuòc dels Pirenèus. Los panèls de la mòstra seràn tanben en occitan.
 
 
 

---

De legir: Eth Haro o eth Taro: eth brandon de Sant Joan ena Val d’Aran


Aran TV junh 2015: Era hèsta deth Taro en Arties




Barcelona TV: Redifusion dera hèsta deth Haro de Les de 2008


www.btvnoticies.cat



Ramon Lara: Hèsta deth Haro de Les