Lo 16 d’agost venent, dos militants de l’organizacion politica Breizhistance IS (Independéncia e Socialisme) seràn jutjats pel tribunal de granda instància de la vila de Roazhon. Los activistas son Corentin Lemonnier e Yoann Colas, acusats del delicte d’aver pintat en breton sus un panèl estradièr qu’èra unicament en francés.

L’accion de protèsta se debanèt dins lo País de Roazhon, ont malgrat qualques progrèsses pontuals en matèria de senhalizacion bilingüa, i a encara una grèva discriminacion del breton en benefici de la lenga francesa. Los dos joves optèron per las accions frapantas coma aquela de defendre la senhalizacion bilingüa integrala dins Bretanha tota, un país ont aquel tipe de senhaletica es absoludament arbitrària e desparièra en foncion de las autoritats localas e de las divèrsas regions del territòri breton. I a la circonstància que Roazhon es la capitala de la region, e per aquela rason i a fòrça mond que considèran que, tot bèl just, aquela vila deuriá donar exemple amb la senhaletica bilingüa.
 
Los dos militants comptan amb lo sosten incondicional de Breizhistance IS, partit qu’a emés un comunicat ont ditz clarament que los dos activistas parlaràn solament la lenga bretona pendent lo lor procès judicial, pr’amor que “la nòstra lenga nacionala deu èsser emplegada en tota circonstància e en quin luòc que siá”. En fach, los dos joves utilizèron ja unicament lo breton quand la gendarmariá los arrestèt. Aquel fach obliguèt las fòrças de seguretat de la Republica de cercar un interprèt per poder comunicar. Segon aquela formacion independentista, aquel fach demostrèt que l’activisme e lo desobesiment faguèron fruch, pr’amor que tot lo procès d’arrestacion se faguèt integralament en lenga bretona.