Lo prefècte de la region de Provença renovèlet dimars passat, 29 de decembre, per sièis ans, l’autorizacion a la societat Alteo de contunhar sas activitats dins lo sit de Gardana (País d’Ais) e d’escampar pendent sièis ans dins la mar de residús industrials cargats d’alumini, de fèrre e d’arsenic en plen Pargue Nacional de las Calancas. Es una decision que foguèt aprovada arunan pel conselh d’aministracion del Pargue Nacional e que l’avián denonciada los ecologistas e quitament la ministra de l’ecologia francesa Ségolène Royal. Mas lo govèrn francés se fisa del rapòrt favorable del Conselh Superior de Prevencion dels Risques Tecnologics (CSPRT) e, doncas, se fisa de la decision del prefècte de Provença, çò rapòrta Le Monde.
 
Las Calancas foguèron reconegudas pargue nacional en abril de 2012, après mai de 10 ans de debats entre los defensors de l’environament e los utilizaires, qu’arribavan pas a un acòrdi
 
Alteo, ancianament nomenada Péchiney, comencèt de produire d’oxid d’alumini a la fin del sègle XIX a Gardana. Se tracta d’una posca blanca resistenta a las nautas temperaturas e a l’erosion, emplegada dins la fabricacion dels abrasius, del veire, de la ceramica e quitament dels ecrans LCD… Los residús produches son cargats de metals pesants, çò que s’apèla las “fangas rojas”. Fins ara, aquelas fangas s’emmagazinavan en plen aire, dins de bacins de depuracion, mas dempuèi 1966 se gètan dins la mar, a granda prigondor, per mejan d’un canon. A l’ora d’ara se gèta 180 000 tonas de fangas rojas cada an.
 
Lo pargue nacional es essencialament maritim, en tenent 158 100 ectaras de mar e 8300 ectaras de tèrra. I a un airal optimal d’adesion (AOA) de 8300 ectaras e un airal maritim adjacent (AMA) de 98 000 ectaras. Totes aqueles territòris compòrtan de nivèls de proteccion especifics amb de restriccions de circulacion, d’estacionament o d’usatge mas tanben una organizacion de la frequentacion dels diferents luòcs terrèstres e maritims.
 
Lo pargue es excepcionalament ric en biodiversitat (140 espècias protegidas d’animals) e es tanben ric en istòria (90 sits arqueologics).