Un trentenat de femnas de la CUP e d’autras organizacions de l’esquèrra independentista e anticapitalista s’acampèron ièr, a Barcelona, per revendicar lor dobla condicion de femnas e de militantas engatjadas dins la lucha politica. Las femnas recitèron publicament davant los presents e davant los mèdias, sens sal ni òli, la cordelada d’insultes masclistas qu’an patit publicament per “èsser de femnas e far de politica”
 
A la faiçon d’un testimoniatge revendictaiu, las deputadas de l’esquèrra independentista catalana clamèron que son “laidas”, “gròssas”, “putas”, “retardadas” o quitament “malbicadas” pel fach d’èsser dins la lucha politica e de defendre “l’educacion e la santat publicas”, “la libertat e la dignitat de las personas e dels pòbles” o “los Païses Catalans liures e feministas”. Elas assumiguèron, doncas, los insultes recebuts per ne mostrar lo “caractèr masclista e politic”.
 
 
En occitan
 
Demest elas, i aviá la deputada aranesa Mireia Boya, qu’es estada victima d’insultes masclistas per revendicar l’emplec de l’occitan dins las institucions publicas e per defendre l’environament e la nacion occitana. “Bon dia. Eth mèn nòm ei Mireia Boya. A jo m’an dit «perra sarnosísima» [canha ronhosissima]. Era unica causa qu’è hèt ei defensar un modèl de territòri sostenable e qu’era mia lengua mairau, er occitan, se pogue parlar enes institucions publiques d’aguest país”, çò a dich. Ne podètz veire lo vidèo çai jos.
 

 
 
 
 
 
 

---