Lo president del Conselh Europèu, Donald Tusk, a anonciat que, divendres, los 28 an destoscat un acòrdi per unanimitat subre una plaça nòva del Reialme Unit dins l’Union Europèa. L’acòrdi, segon lo primièr ministre britanic, David Cameron, dona al Reialme Unit un estatut especial dins l’UE. Cameron a recomandat a sos ministres que lo sostengan e, tre dissabte, a convocat lo referendum pel 23 de junh. Lo president de la Comission, Jean-Claude Juncker, tanben a piulat qu’es content per l’acòrdi, que l’a descrich coma just pel Reialme Unit e just pels autres 27 estats de l’UE. “Los meses de trabalh dur amb lo president del Conselh e la cooperacion amb lo Parlament an valgut la pena”, çò a assegurat lo luxemborgés.
 
L’acòrdi dels lidèrs de l’UE per evitar una sortida del Reialme Unit, lo “Brexit”, Tusk l’a anonciat amb aquel piulet:
 

Deal. Unanimous support for new settlement for #UKinEU

— Donald Tusk (@eucopresident) 19 febrer, 2016

“Ai negociat un acòrdi per donar al Reialme Unit un acòrdi especial a l’Union Europèa. Lo recomandarai al gabinet dels ministres deman”, çò a piulat David Cameron après doas longas jornadas de negociacions a Brussèlas. La reünion s’es programas per dissabte a 10h, a Londres, e per diluns Cameron deu intervenir a la Cambra de las Comunas per far avançar lo referendum.

Dins una conferéncia de premsa per anonciar l’acòrdi, Cameron a celebrat que lo pache es sufisent per recomandar amb lo referendum que lo Reialme Unit rèste dins l’Union Europèa. “Serem dins las partidas d’Euròpa que foncionan per nosautres”, çò a dich Cameron, en remarcant que, en mai d’aquò, seràn en defòra de las que foncionan pas coma las frontièras dobèrtas, los salvaments financièrs e l’èuro.
 
L’acòrdi prevei que lo Reialme Unit pòsca aplicar un “fren d’emergéncia” a las ajudas socialas pels trabalhadors comunautaris durant un periòde de sèt ans. La restriccion afectarà lo trabalhador durant quatre ans, e serà graduala: lo primièr an recebrà pas cap de mena de pagament, fins que, passats los quatre, ja lo recépia sencer. “Auràn d’esperar quatre ans per aver l’accès total a nòstras ajudas”, çò a dich Cameron dempuèi Brussèlas.
 
Lo pache tanben permet als britanics d’empedir que los nòus immigrants de la rèsta de l’UE que i arriben, o los enfants que i nascan, sián autorizats de recebre l’ajuda per enfant, çò qu’apèlan lo child benefit (“benefici enfant”), abans que la nòva legislacion intre en vigor. Pels qu’actualament recebon l’ajuda, s’adaptarà a la baissa a partir de 2020. Los païses de l’èst de l’UE volián evitar que los ciutadans comunautaris que ja recebon aquela ajuda la perdèsson, mas finalament s’es impausat la proposicion britanica dins una negociacion fòrça intensa, segon çò qu’a admés lo quite Cameron.
 
Lo govèrn de David Cameron tanben a obtengut que los autres sòcis fagan una referéncia explicita a exclure lo Reialme Unit de la frasa dels tractats que parla d’una Euròpa de mai en mai unida. Al nivèl financièr, Cameron a pogut inclure dins l’acòrdi una clausa que dona a un país lo drech d’impausar un fren a la regulacion financièra controvertida durant las reünions dels lidèrs del Conselh Europèu. De fach es un poder de “vèto” subre la regulacion financièra, e lo voliá evitar lo president francés François Hollande.
 
Aquelas doas mesuras se deuràn aplicar a travèrs d’una modificacion dels tractats europèus. Cameron a explicat, e mai, que los cambiaments decidits seràn “legalament constrenhents” per la lei internacionala e los estats poiràn pas anar enrière sens unanimitat.
 
“Farai campanha amb lo còr e l’arma per seduire las gents per fin que rèsten dins aquesta UE reformada que uèi la me soi obtenguda”, çò a dich David Cameron. Lo primièr ministre britanic a explicat que lo referendum serà un “moment istoric” pel Reialme Unit. “Virar l’esquina a l’UE es pas una solucion”, çò a avertit, en remarcant qu’encara a agut e qu’a de “dobtes subre l’UE coma organizacion”, mas crei qu’es melhor de i demorar. “Qu’una organizacion siá frustranta aquò vòl pas dire que ne degas partir”, çò a dich Cameron, en defendent que lo Reialme Unit es “pus fòrt e pus segur” dedins l’UE.
 
 
L’avaloracion de Tusk e Juncker
 
Lo president del Conselh, Donald Tusk, a assegurat en conferéncia de premsa que l’acòrdi es legalament constrenhent e irreversible e que refortís l’estatut especial del Reialme Unit dins l’UE. Lo polonés a soslinhat que lo Reialme Unit a de besonh de l’UE, e que l’UE a de besonh del Reialme Unit e que, per tant, los lidèrs europèus an fach tot çò qu’an pogut per que los britanics sián convencuts per l’acòrdi nòu. “Aimi lo Reialme Unit e aimi Brussèlas”, çò a dich lo president del Conselh, en respondent a Cameron, qu’a sa compareissença a dich qu’aima pas Brussèlas mas son país.
 
Lo president de la Comission, Jean-Claude Juncker, a galejat qu’el aima mai Brussèlas que certans luòcs d’Euròpa. “L’acòrdi respond a totas las preocupacions del Reialme Unit e respècta a l’encòp los principis de basa de nòstra union”, çò a dich lo luxemborgés, qu’a insistit sus la bona volontat de totes los estats membres per reüssir lo pache.