S’acaba uèi a Dublin l’edicion 2016 de la corsa per la lenga irlandesa nomenada Rith. Partiguèt fa onze jorns a Cill Droichead e après percórrer 2600 quilomètres per totes los comtats de l’illa, e per mai de dos cents comunas, se conclutz dins l’istorica bastissa dels corrièrs de Dublin, un dels simbòls de l’insurreccion irlandesa de Pascas de 1916, qu’ongan commemòra son centenari.
 
Pendent aqueles onze jorns s’es debanat per tota l’illa d’actes de promocion de la lenga. L’eveniment a engatjat 50 000 correires qu’an revendicat de difondre lo gaelic dins totes los espacis de la vida vidanta.
 
Lo Rith es inspirat, sens cap de dobte, de la Korrika basca, la corsa de relèus que s’organiza al Bascoat dempuèi 1980 e que mobiliza cada an qualques milièrs de personas de tot lo país. La reüssida de la Korrika a inspirat tanplan lo Redadeg, la corsa per la lenga bretona que dempuèi 2008 percor cada dos ans tot lo territòri de Bretanha, lo Correllengua dels Païses Catalans. En cò nòstre, cal mençonar l’Occitània a Pè, que percorrèt lo país nòstre de las Valadas fins a Aran en 2008, la Chancada, que travèrsa cada an tota Gasconha en chancas per promòure la lenga nòstra, e encara la corsa Aran per sa Lengua, que cada darrièra dimenjada de julhet mobiliza tota la Val d’Aran per l’usatge social de la lenga occitana.