Nadezhda Tolokonnikova, Mariia Aliokhina e Iekaterina Samutzevich, sòcias de la banda punk Pussy Riot, son estadas condemnadas a dos ans de preson en essent  consideradas colpablas de “vandalisme motivat per òdi religiós”. Per carrièras, la polícia a arrestat qualques personas que protestavan contra lo jutjament, demest los quals i aviá dirigent de l’oposicion Garri Kasparov.

Pussy Riot es una banda de punk rock feminista, nascuda arunan, que denóncia la manca de transparéncia politica, la manca de libertat d’expression e la persecucion dels opausants. En febrièr passat, cinc sòcias del grop intrèron dins la Catedrala del Crist Salvador de Moscòu, cobèrtas amb de cagolas de colors, e interpretèron la cançon Santa Maire, Verge Benesida, fot Putin defòra (vidèo).
 
Tres d’elas foguèron arrestadas e empresonadas en març passat. Segon lo ministèri public, “agiguèron d’un biais extrèmament vulgar dins un luòc coma aquel” e la cançon que cantèron èra “insultanta e un sacrilègi pels ortodòxes”.
 
 
De musicians de pertot an donat lo lor sosten a las Pussy Riot, demest los quals i a Madonna, Peter Gabriel, Red Hot Chili Peppers, Björk, Jarvis Cocker e Paul McCartney. Per contra, los principals musicians de Russia an optat per se calar. Segon Reuters, los principals artistas russes vòlon pas metre en perilh la lor principala font de sòus, que proven dels concèrts privats per milionaris e de las interpretacions a la television. Per contra, un centenat d’artistas russes —musicians, actors e escrivans— an signat una letra que demanda la liberacion de las tres musicianas.
Las Pussy Riot comparan lo jutjament a la repression staliniana e lo lor avocat assegura que tot verdicte que siá pas lo d’innocéncia serà illegal.
 
D’accions en sosten de las Pussy Riot se son debanadas dins mai de 50 vilas per lo Mond entièr.
 

Putin atisa lo fuòc, nòu single de Pussy Riot
 
Pussy Riot ven de publicar una nòva cançon en coïncidissent amb lo jorn que s’es fach public lo verdicte que las condemna a dos ans de preson per “vandalisme motivat per òdi religiós”. S’entitola Putin atisa lo fuòc, e lo jornal The Guardian a fach un vidèo amb d’images del jutjament e de las accions de sosten que se son debanadas pertot.