Vicent Partal, director del jornal catalan Vilaweb, publiquèt dimars passat una analisi que l’adaptam çai jos en occitan.

Dempuèi d’annadas, òm sap que Brussèlas es un dels grands centres jihadistas d’Euròpa. Lo quartièr de Molenbeek es vengut mai que mai un veritable bastion dels grops pròches d’Al Qaida e de l’Estat Islamic. Es aquí que s’amaguèt pendent qualques setmanas Salah Abdeslam, lo fugitiu dels atemptats de París, capturat fin finala divendres passat.
 
Totun, la relacion de Brussèlas amb lo jihadisme ven de luènh. Al començament dels ans 1960, finançada per l’Arabia Saudita, se dobriguèt una mosqueta granda al Pargue del Centenari, qu’es estat lo centre mai important de difusion de l’ideologia wahhabita en Euròpa.
 
Lo wahhabisme (de l’arabi  الوهابية‎, al wahhābiyya) es un movement fondamentalista qu’es vengut lo sistèma sòciopolític oficial en vigor en Arabia Saudita. S’agís d’un sistèma religiós extrèmament rigorista, a causa de la cresença del sieu fondador que tot çò qu’apareguèt dins l’islam après las tres primièras generacions a partir del profèta èra innovator e corrompiá la fe. Per tant lo wahhabisme preconiza d’utilizar sonque lo Coran e los Hadits coma font de la religion, e prescindir de tota autra nocion que siá aportada per la tradicion. Se caracteriza tanben per sa volontat d’espandiment e, a l’ora d’ara, a estendut considerablament son influéncia amb la creacion de centres d’estudis e de mosquetas per tot lo Mond, finançats amb l’ajuda dels recorses economics de la dinastia saudita. Tant Al Qaida coma l’Estat Islamic an lor font ideologica dins lo wahhabisme, que se coneis tanben amb lo nom de “salafisme saudita”.
 
Fa tres ans, Wikileaks revelèt l’enòrme chepic del govèrn bèlga per las activitats d’aquela mosqueta. Belgica, de fach, obtenguèt que se cambièsse lo president de la fondacion que la gerissiá, Khalid Alabri, un foncionari saudita que las autoritats europèas identificavan coma un dels principals promotors de las activitats wahhabitas.
 
 
Molenbeek, lo quartièr jos una susvelhança permanenta
 
Situat dins la banlèga de Brussèlas, se tròba Molenbeek (Sint-Jans-Molenbeek, en flamenc). Molenbeek es un de las dètz e nòu municipalitats que forman la capitala federala e i cabon aperaquí ochanta mila estatjants, mas amb una densitat qu’es lo doble de la rèsta de la capitala, a l’entorn de tretze mila abitants per quilomètre cairat.
 
La relacion dels abitants de Molenbeek que son estats restacats a d’activitats jihadistas dins las darrièras annadas es tant impressionanta coma esclairanta. I a d’estatjants qu’es confirmat que participèron a l’assassinat del comandant Massud en Afganistan (9 de setembre de 2001), als atemptats de Madrid de 2004, a l’ataca del Musèu Josieu de Brussèlas (en mai de 2014), a l’assassinat d’un policièr en genièr de 2015, a l’ataca del tren Thalys (en agost de 2015) e als atemptats de París de novembre passat. La polícia bèlga a identificat tanben dos cents abitants d’aquel quartièr, almens, que se son engatjats dins la guèrra en Siria e dins los rengs de l’Estat Islamic.
 
Oficialament, a Molenbeek i a quatre mosquetas, mas se sap que i a un dotzenat d’autres centres, non reconeguts per l’estat e ont se desvolopa la version mai dura e intransigenta del wahabbisme. Las relacions entre las autoritats e la comunautat islamica son pas estadas totjorn aisidas. Pendent d’annadas, lo cònsol socialista de la vila, Philippe Moureaux, obtenguèt una cèrta convivéncia, mas sos detractors afirman que reüssiguèt en pagant lo prètz de daissar lo camp liure a las autoritats religiosas e de clucar los uèlhs gròsses davant la creissença dels grops mai extremistas.
 
Coma totjorn, la question economica es la clau per comprene çò que se passa. Sens lo nivèl de pauretat e de tension sociala que s’i viu, se pòt pas explicar l’impacte del movement wahhabista. Molenbeek es fòrça près del centre de Brussèlas, mas a una taxa de caumatge superiora al 60%. Los servicis socials son clarament desbordats e i a fòrça problèmas de santat e d’educacion. Dins qualques quartièrs la populacion es omogenenèament d’origina maugrabina o paquistanesa, e las autoritats bèlgas an fòrça problèmas per contrarotlar la situacion. I a de carrièras ont se ditz que la polícia i intra pas jamai, e per tant aquel quartièr es vengut un refugi priviliegiat per las gents recercadas per la polícia en Euròpa tota.
 
 
 
 
Vicent Partal
 
 

---

Aqueste article foguèt publicat ièr en catalan sus Vilaweb, que Jornalet i ten un acòrdi de cooperacion