Coma cada Dimenge de Pascas, los sobeiranistas bascos an commemorat lo dich “Aberri Eguna” (lo Jorn de la Pàtria). Aquela jornada se celèbra dempuèi 1932 e ven cada an un termomètre del sobeiranisme basco. Ongan la celebracion es venguda mai que mai importanta après la liberacion d’Arnaldo Otegi, qu’a donat de vam als independentistas fàcia a las eleccions que se debanaràn la davalada que ven, mai que mai s’Otegi se pòt presentar coma candidat a lehendakari.
 
Coma es ja tradicional, lo Partit Nacionalista Basco (EAJ-PNB) faguèt un acte a miègjorn a Bilbao e EH Bildu jonguèt la celebracion convocada pel ret Independentistak a Pampalona. En mai d’aquò, Podèm organizèt un rescontre a Sant Sebastian.
 
Las eleccions de la davalada seràn un termomètre per l’independentisme basco, mai que mai amb la dificultat aponduda de l’espelida de Podèm que creis amb fòrça dins lo Bascoat. Dins las eleccions espanhòlas passadas venguèt lo partit mai votat en Bascoat, quitament davant l’EAJ-PNB. Aquel partit a reüssit a convéncer amb un discors que respècta la singularitat basca e lo drech de decidir.
 
 
Comunicat d’ÈTA
 
En ocasion d’aquela fèsta nacionala ÈTA a reaparegut en publicant un comunicat sul jornal Gara, que planh qu’après cinc ans d’alta al fuòc, lo procès de patz siá pas començat pr’amor que i a pas agut de dialòg amb los estats espanhòl e francés, ni mai amb las fòrças politicas bascas, levat lo Bascoat Nòrd.
 
Segon çò qu’ÈTA ditz dins aquel long comunicat, las consequéncias del conflicte son totjorn sens solucion, mai que mai, l’escuèlh principal per rapòrt als presonièrs que patisson una politica de dispersion, alonhament e d’autras mesuras especialas que l’estat espanhòl las aplica solament als presonièrs bascos.