Los collectius País Nòstre (Occitània) e Sem (Catalonha) an començat uèi a Talteüll —una comuna de Catalonha atenent Fenolhedés—, la campanha en favor del nom “Occitània-País Catalan” per la region centrala, fruch de la fusion de Lengadòc-Rosselhon e Miègjorn-Pirenèus.
 
A partir de 10 oras del matin se ten un rassemblament dins lo palais dels congrèsses en preséncia de nombroses elegits.
 
A partir de diluns e fins al 10 de junh, se poirà votar un nom per aquela region, entre los noms seguents:
   
Poiràn votar totas las personas de mai de 15 ans que demòran dins aquel territòri o que i demòstran de ligams. Ça que la, per votar caldrà aver un telefòn mobil francés, çò qu’empacharà de votar la nombrosa diaspòra occitana e catalana al sud de la frontièra politica.
 
Lo 24 de junh, una assemblada plenièra de la region avisarà lo govèrn francés del nom causit dins aquel procès participatiu, puèi lo Conselh d’Estat francés deurà validar aquel nom abans lo 1r d’octòbre. Pasmens la decision ciutadana es pas inalienabla e las autoritats de l’estat an totjorn lo darrièr mot. Aquí s’acabarà lo procès ciutadan d’aquela granda consulta sul nom de la region, organizada per Gérard Onesta, lo president del burèu del conselh regional.