Contunhan los escambis entre las universitats de Lhèida (Catalonha) e de Tolosa-Joan Jaurés. Arunan, d’estudiants del gra d’estudis catalans e occitans de l’universitat catalana faguèron un sejorn a Tolosa per aprigondir lors coneissenças de lenga e literatura occitanas e per conéisser de près la realitat del país. Ara ven als tolosans de vesitar Lhèida.
 
Dempuèi diluns passat, se tenon a l’Universitat de Lhèida e en divèrses endreches de la vila d’activitats sus las lenga e la literatura occitanas. Los catalans que seguisson los estudis occitans a Lhèida an agut l’escasença d’èsser ensenhats pels professors Joan-Francés Courouau, Joèla Ginestet, Jacme Gourc e Patric Sauzet.
 
En mai d’aquò, se son tengudas d’activitats complementàrias coma una presentacion e una taula redonda dels trabalhs e projèctes en cors a l’entorn de l’occitan e mai la vesita de l’ostal d’edicion Pagès Editors, qu’a quatre linhas de publicacions en lenga nòstra. Podètz trobar lo programa dins lo document çai-jonch.