Iniciativa per Occitània crida a un rassemblament per defendre l’ensenhament de l’occitan en Provença. La protèsta se tendrà a Manòsca lo 31 de mai que ven a 10 oras, davant lo Licèu Fèlix Esclangon (mapa) e exigís “lo mantenement e desvolopament dei cors d’occitan ara menaçats”, e mai, “una ofèrta generalizada de cors d’occitan dins totei leis escòlas e dins totei lei domenis de formacion de la mairala a l’universitat”.
 
Aquela accion es la seguida d’una campanha per salvar los corses d’occitan dins los licèus e collègis de Manòsca, Aurenja, Chastèu Arnós, Cadenet, Cavalhon, Costelet, Tarascon… que lor supression es anonciada per la rintrada que ven. La peticion en linha a amassat ja a l’entorn de 800 signaturas.
 
 
L’ensenhament de l’occitan menaçat dins tot lo país
 
La reforma francesa dels collègis, prevista per la rintrada de 2016, prevei de marginalizar mai encara l’ensenhament de l’occitan e representa un pas enrèire quitament per rapòrt a la lei francesa de l’educacion de 2013.
 
En consequéncia d’aquela reforma s’anóncian d’atacas similaras contra l’occitan per tot lo país. Per exemple, cèrcan de suprimir l’occitan al Collègi Sant Maur de Pau (Bearn). En Peiregòrd, lo Collectiu dels Mespresats defend l’ensenhament de l’occitan mai sas demandas se tustan al refús del Conselh d’Estat.
 
Tanben, la Federacion dels Ensenhaires de Lenga e Cultura d’Òc (FÈLCO) se bat contra aquela reforma en participant a de nombrosas protèstas e en se reünissent amb los elegits. Dins aquel sens, per mostrar lor desacòrdi, e per demandar que l’ensenhament de las nòstras lengas se mantenga, e mai per que se melhore la precària situacion actuala, la FÈLCO a lançat una peticion publica al Ministèri francés de l’Educacion Estatala, qu’a atench mai de 6700 signaturas.