Lo 10 de junh passat s’acabèt una consultacion per decidir un nom per la region centrala d’Occitània, fruch de la fusion de Lengadòc-Rosselhon amb Miègjorn-Pirenèus. Los resultats se sabon pas encara, e se tenon secrets. Segon qualques mèdias, uèi se'n revelarà lo resultat. Aquel mutisme total a inquietat fòrça mond. Lo Partit Occitan exigís de “democracia” e que lo resultat del vòte se faga public, EELV denóncia un blocatge dels resultats e País Nòstre crida a manifestar lo 24 de junh a Montpelhièr per que se respècte lo resultat del vòte.
 
De son costat, Joan-Francés Laffont, president de la Convergéncia Occitana e sòci del comitat del nom, demanda a la region de comunicar sul biais que se fa lo despolhament, de far saber se las resultas seràn conegudas “de faiçon instantanèa”, de fa saber quinas personas detendràn los resultats, de fa saber s’un uissièr intervendrà o encara se los mèdias seràn convidats, çò rapòrta La Setmana. “Cal evitar a tot prètz las contestacions ulterioras que vendrián roïnar totes los esfòrces de transparéncia e las garentidas democraticas que foguèron portadas al procès fins ara”, çò escriu Laffont, “aquel questionament cèrca doncas d’identificar una eventualitat e de barrar la pòrta a tota polemica vana a l’eissida de l’escrutini”.
 
De fach, lo 24 de junh, una assemblada plenièra de la region avisarà lo govèrn francés del nom causit per la region, puèi lo Conselh d’Estat francés deurà validar aquel nom abans lo 1r d’octòbre. Pasmens la decision ciutadana es pas inalienabla e las autoritats de l’estat an totjorn lo darrièr mot de dire. Aquí s’acabarà lo procès ciutadan d’aquela granda consulta sul nom de la region.
 
Segon nòstres confraires de France 3 en occitan, lo quite Gérard Onesta, iniciaire de procès, coneis pas los resultats.