Turquia ja a una primièra victima dins sa guèrra contra los curds de l’estat sirian. Un soldat turc es mòrt après un atac dels curds sirians contra un convòi de tancs turcs qu’èran intrats dins lo territòri del Curdistan Occidental, tanben nomenat Rojava. Amb aqueste atac e l’intrada de Turquia dins la guèrra la situacion se poirà pas qu'agravar, çò dison divèrses analistas internacionals.
 
Pendent l’atac dels curds, tres tancs turcs foguèron destruches. De mai, plusors fonts d'informacions assolidan que fa mens de set jorns las fòrças terrèstras turcas aurián començat d’ocupar Rojava. La rason seriá que Turquia es ara oficialament en guèrra contra l’Estat Islamic, mas tanben atacariá a l’encòp los curds sirians.
 
En mai d’aquò, divèrsas fonts curdas an raportat que los turcs, dins lor recenta ocupacion de territòri curd sirian, aurián tanben atacat amb lors fòrças aerianas la populacion curda la setmana passada, e ara i auriá mai de 15 personas mòrtas del costat curd. L’atac foguèt qualificat per las fòrças curdas coma “una escalada de la violéncia fòrça perilhosa”. Tanben an confirmat que d'autres tres soldats turcs serián estats ferits per de soldats curds sirians endacòm mai.
 
Un autre atac tanben seriá estat confirmat a l’aeropòrt de Diyarbakır amb de fusadas. Ça que la, non i aguèt pas de victimas.
 
Turquia auriá assegurat que la campanha militara que ven de començar, s'acabarà pas fins que la terror siá finida, en referéncia als atemptats que lo país otoman a recebuts pendent los darrièrs meses de part de cellulas terroristas de l’Estat Islamic e dels curds sirians, çò ditz lo govèrn turc.
 
D’un costat, Turquia a paur que los atacs jihadistas pòscan èsser mai fòrts. E de l’autre, tanben cranh que los curds sirians pòscan conquistar un airal de terriòri sirian al bòrd de sa frontièra per tal d’ajudar los militants del Partit dels Trabalhadors de Curdistan (PKK) dins l’estat turc, amb qui l’armada turca a lançat ongan una guèrra dobèrta sens fin. Lo PKK vòl l’autonomia per lo territòri curd en Turquia.
 
Aquel moviment militar de Turquia complicariá la situacion de la guèrra civila siriana pr’amor que las doas poténcias, Turquia e los curds, son d’aliats dels Estats Units.
 
 
De bombas de barril a Alèp
 
D’un autre costat, doas bombas de barril aurián espetat dins la vila siriana d’Alèp segon l’Observatòri Sirian pels Dreches Umans de las Nacions Unidas. La primièra auriá provocat la mòrt de plusors enfants. La segonda auriá causat encara mai de mòrts pr’amor qu’espetèt dins una molonada qu’èra venguda per ajudar las victimas de la primièra explosion.
 
De mai, l’enviat especial de l’ÒNU en Siria, Staffan de Mistura, auriá demandat una alta al fuòc per poder ajudar la populacion d’aquela vila. Lo govèrn sirian, de son costat, a confirmat qu’auriá conquistat tornarmai la vila de Darayya, près de la capitala de Siria, Damasc. Aquela vila èra estada jos lo contraròtle dels rebèls sirians dempuèi lo començament de la guèrra fins a aquesta setmana. Son sèti, doncas, se seriá debanat pendent mai de quatre annadas.
 
Aquò auriá provocat la fugida de milièrs e milièrs d’abitants de la vila de Darayya, dont un enfant nomenat Yazan de quatre ans d’edat . Un còp en territòri segur, li balhèron un glacet. Èra lo primièr còp que Yazan tastava un glacet, çò diguèt sa maire, pr’amor que pendent lo sèti n’i aviá pas e el nasquèt pendent lo sèti.
 
 
 
 
Christian Andreu




Imatge: Vilaweb