Lo Partit Occitan (PÒC), lo movement País Nòstre e d’autres representacions de l’occitanisme participaràn uèi a la manifestacion que se tendrà a Perpinhan a partir de 15h per revendicar que lo nom de la region represente tanben la partida catalana del territòri.
 
“Los catalans devon poder existir e decidir lor avenir”, çò ditz un comunicat del PÒC, que, tocant lo nom de la region qu’a causat la protèsta, es “favorable a un nom qu'assòcie «Occitània» amb un adjectiu. S’agiriá de respectar lo fach que d’autras regions son tanben occitanas”. En mai d’aquò lo PÒC se declara “favorable a un nom qu’intègre «Catalonha» o «País Catalan»”. Après la causida eissida del procès participatiu, que lo Conselh Regional i causiguèt “Occitània” amb lo sostítol “Pirenèus-Mediterranèa”, lo PÒC ditz qu’ara “cal trobar una sortida per lo naut amb un estatut per la Catalonha Nòrd per s’enfonzar pas dins una oposicion caricaturala dels catalans contra los occitans. Al contrari, es l’ocasion de construir un avenir”.


Ne parla lo New York Times
 
Lo New York Times ne publicava dijòus passat un reportatge qu’analisa lo procès d’eleccion del nom de la region e lo malèsser dels catalans. Centrat sul testimoniatge de qualques catalans del nòrd, l'article explica çò que son Occitània e l’occitan, mas qu'aquestes concernisson pas los catalans.
 
 
Front comun d’associacions e d’elegits
 
Aquela manifestacion a luòc un jorn abans la fèsta nacionala de Catalonha, l’11 de setembre, que de manifestacions per l’independéncia son previstas dins plusors vilas catalanas. Los sectors catalanistas de Catalonha Nòrd an lançada una crida als catalans del sud, “coma gèst de solidaritat entre de territòris dels Païses Catalans”.
  
La manifestacion seguís la crida d’un front comun de las associacions catalanistas de Catalonha Nòrd, los cònsols màgers de 147 comunas e d’elegits del Conselh Departamental dels Pirenèus Orientals. Exigisson de l’estat francés que la nòva region nomenada “Occitània”, fruch de la fusion de Miègjorn-Pirenèus e de Lengadòc-Rosselhon, comprenga tanben “País Catalan”. Espèran que tota aquela mobilizacion sens precedents siá presa en compte pel Conselh d’Estat a l’ora de validar lo nom de la region.
 
Aquel front comun inedit de Catalonha Nòrd a lançada una campanha per portar la revendicacion a las mai nautas institucions de l’estat francés. Lo primièr ministre francés, Manuel Valls, los a recebuts e ara an demandat una reünion amb lo president francés François Hollande. En mai d’aquò, presentaràn un recors davant lo Conselh d’Estat que deu decidir lo nom definitiu de la region abans lo 1r d’octòbre.
 
 
“Sèm pas contra Occitània”
 
“Sèm pas contra Occitània, sèm en favor del País Catalan”, çò ditz Joan Becat, geograf, professor emerit a l’Universitat de Perpinhan e membre del comitat pel nom de la nòva region (àudio). “Dins l’estat francés, los departaments e las regions an totjorn agut de noms nèutres, geografics o d’ancianas províncias. Ara an causit un nom d’identitat, que fa referéncia a una lenga e una cultura d’una part del territòri. Mas dins la region i a doas lengas e culturas”, çò precisa Becat.
 
Per Becat, lo nom País Catalan a pas de connotacions politicas, mas “es un nom banal que s’utiliza amb absoluda normalitat aicí. A pas res a veire amb las demandas nacionalistas”. Per aquò afirma que pels catalans “nos far desaparéisser nos es insuportable”.
 
Pasmens, Becat pensa que i aurà una solucion consensuala entre catalans e occitans pendent aqueste mes de setembre.