L’elegit catalan Francesc Homs foguèt entendut ièr davant la justícia espanhòla per aver ajudat a l’organizacion del movement participatiu del 9 de novembre de 2014, qu’en Catalonha e Aran se votèt sus l’independéncia del país. L’acusan de desobesissença, malversacion e prevaricacion après l'enebicion d'aquela consulta pel Tribunal Constitucional. En aquel temps Homs èra conselhièr de la presidéncia de la Generalitat de Catalonha e a l’ora d’ara es lo pòrtavotz del Partit Democrata Catalan al Congrès dels Deputats espanhòl.
 
Homs defendèt davant lo jutge la legalitat d’aquel vòte e afirmèt qu’o tornariá far. “Çò que faguèrem seguissiá lo mandat democratic del Parlament de Catalonha, facilitàvem la participacion ciutadana e l’exercici de la libertat d’expression”, çò diguèt.
 
Diguèt tanben davant lo jutge que las institucions de l’estat agisson arbitràriament en çò que tanh al procès d’independéncia de Catalonha e Aran, en seguissent los dictats del Partit Popular. Dins aquel sens diguèt net e clar que l’estat espanhòl “[aviá] pas agit coma un estat de drech democratic o auriá degut far”.
 
Homs mençonèt al jutge l’escàndol dels registraments que mòstran lo ministre de l’Interior espanhòl a conspirar, per fin de trobar d’escàndols dins los partits independentistas de Catalonha, e li diguèt qu’après remarcar que tot aquò li semblava puslèu un procès politic que non pas juridic, aviá “lo sentiment que la senténcia [èra] ja prononciada”.
 
 
Sostengut e acompanhat
 
Homs arribèt a Madrid acompanhat per una larga delegacion, en tot aver recebut lo sosten del del govèrn de Catalonha e de las associacions independentistas.
 
Los 50 darrièrs mètres abans d’arribar al palais de justícia, Homs caminèt amb la companhiá de l’èx-president Artur Mas, de la vicepresidenta Neus Munté, de qualques conselhièrs (ministres regionals), d’autres elegits catalans e de qualques responsables del Partit Democrata Catalan (èx-Convergéncia Democratica de Catalonha). Tanben l’acompanhavan los deputats catalans a Madrid.
 
Al delà del sosten dels partits independentistas, Homs recebèt tanben lo sosten del partit esquerrista En Comú-Podem.
 

El Tribunal Suprem interroga avui a Francesc Homs pel #9N. És una mala noticia per la democràcia que es judicialitzi la política. (1/3)

— En Comú Podem (@EnComu_Podem) 19 de setembre de 2016

 

Dubtem que qui va començar tot això enfrontant la Constitució a les urnes ho resolgui ara utilitzant exactament els mateixos mitjans. (2/3)

— En Comú Podem (@EnComu_Podem) 19 de setembre de 2016

 

En Comú Podem creu que s'ha d'anar a l'arrel del problema, que no és una altra cosa que reconèixer la sobirania del poble català. (3/3)

— En Comú Podem (@EnComu_Podem) 19 de setembre de 2016