“Aran es una nacion, una part de la nacion occitana, amb sa lenga oficiala en Catalonha, qu’es l’occitan, e doncas amb identitat nacionala, e a lo drech [d’autodeterminacion]”, çò diguèt net e clar ièr a Madrid, lo president de la Generalitat de Catalonha, Carles Puigdemont, davant un fum de jornalistas e de representants politics e economics, e dètz ambaissadors, dont lo de França.
 
Puigdemont anèt a Madrid per explicar quina es la proposicion de referendum d’independéncia de 2017, qu’a lo sosten de la majoritat del Parlament catalan. Davant un auditòri tot plen que comptava amb la preséncia de dètz ambaissadors mas cap de membre del govèrn espanhòl, Puigdemont expliquèt que la situacion politica en Espanha s’èra considerablament deteriorada dins lo darrièr an, e planguèt que l’estat respondèsse amb de jutges e de procuraires a las demandas dels catalans que revendican una solucion politica.
 
 
 “Seriá prudent de mespresar pas lo referendum”
 
“Prepausam a l’estat espanhòl un acòrdi pel referendum”, çò diguèt Puigdemont en avertissent qu’en Catalonha “i a un consens social e politic, e seriá intelligent e prudent de lo mespresar pas”. Mas se lo govèrn espanhòl contunha sus sa posicion de ne voler parlar pas, lo referendum se farà de tot biais.
 
 
"Aran es una part de la nacion occitana"
 
Après sa conferéncia, Puigdemont respondèt a las questions dels jornalistas. Interrogat sus perqué Espanha pòt pas votar  tota, o perqué Barcelona pòt pas aver son referendum particular, lo president remembrèt que dins lo referendum del Brexit aviá pas pogut votar l’Union Europèa e que “Barcelona es pas una nacion”.
     
 
Dètz ambaissadors an escotat Puigdemont
 
Dins son discors, Puigdemont soslinhèt davant los representants diplomatics d’un desenat de païses, lo larg sosten social e politic del referendum, e tanben de l’independéncia en Catalonha.
 
E mai i participèsse pas cap de representant del govèrn espanhòl, l’eveniment comptava amb los representants de l’ambaissador de França, Yves Saint Geours; lo del Reialme Unit, Simon Manley; lo d’Egipte, Ahmed Ismail Abdelmoeti; lo d’Irlanda, David Cooney; lo d’Argeria, Taous Feroukhi; lo de Veneçuèla, Mario Isea Bohórquez; lo de Belgica, Pierre Labouverie; lo de Danemarc, John Nielsen; lo dels Païses Basses, Johannes Van Bonzel; lo de Suècia, Lars-Hjalmar Wide.
 
A respècte de la classa politica espanhòla, solament èra present lo pòrtavotz socialista a l’Assemblada de Madrid.
 
A miègjorn, Puigdemont s’amassèt per dinnar amb lo cap de Podèm, Pablo Iglesias.
 
Podètz escotar tota la conferéncia dins lo vidèo que seguís.