I agèt tanben una manifestacion aqueste disssabte 15 a Limós per defendre la linha Carcassona-Quillan e, en particulièr, la ligason Limós-Quilhan.

ieu que soi originari per ma familha d'un vilatjot que d'un costat d'Alièr s'apèla lo Novèl Monde (Lèger Nauta) e de l'autre Chap auros (ont i a la gara sus aquela linha), soi d'acordi a cent del cent ambe lo raiou.

Justament que sòrte d'aquel caire de las Cevenas, pòde vos afortir que la SNCF se trufa bien de nautres. Aquesta linha vei de mai en mai sos trins remplaçats per de carris partent dau pè de las Cevenas (Alès) e tirant enjuscas la Marjarida (Lengonha). Aquel polit viatge vos fai percórrer las Cevenas dinc de condicions pas gaire confortablas, vist que la rota vira tant e mai... Vos dise d'una que, de còps que i a, lo regolitge vos acampeja. Mès vau pas negrejar la situacion, que la despartamentala seguèt melhorada pendent dètz ans e mai : aquò ne'n fai una bòna rota de montanha (es encara a se melhorar dau costat de la Marjarida onte lai es pro plana erosament).

Pasmens, a l'ora d'ara que se parla de transpòrts collectius per limitar la pollucion, de desvolopament economic dau rèire-país, dau manten de las familhas e dals servicis publics dinc las comunas ruralas, coma volètz faire emb d'una linha que fai pas son òbra ?

Una politica ambiciosa per cargar las mercandisas sobre los trins ; una politica ambiciosa de repoplament d'aqueles airaus (deseiretats e oblidats per l'Estat) seguida d'una politica encitant a l'estallacion de fabricas de talha umana, d'artesants de tota mena, de pichòtas e mejanas entrepresas : aquí la solucion !
Se poiriá nosar un partenariat comerciau entre Auvèrnha e Provença, Lengadòc au mitan, per que chascun achapte a l'autre ce que produtz pas dinc la siuna region : una mena de granda pacha enterregionala.
Aicí deuriá èstre l'amira e un dals tòcs màgers de las novèlas macroregions !

Las linhas de l'Aubrac e dau Cevenòu, dos nèrvis au còr dau País d'Òc que deuriáun servir per liar tornarmai e coma o es totjorn estat en cò nòstre, la baissa emb de l'autura : logica vitala e prometeira per una part d'Occitania. Vejaicí un subjèct socioeconomic que poiriam entegrar als tèmas de batuèsta que portarem a la manifestacion que ven (pas solament la lenga e la cultura, mès tanben lo sociau e l'economic per pertocar la populacion).
Mès nòstres politicians regionaus saique son mai preocupats d'agradar als òlis parisencs de lur sensibilitat politica, òlis que se socitan mai de la competitivitat enternacionala de França dinc la guèrra econimica mondiala !

Los elegits regionaus e locaus an lo DEVER de sosténer la democracia locala, la populacion e los enterès locaus : OBLIGACION !
Autrament, son pas dignes de la plaça que lurs es atribuïda ! Amai quò se ditz "empostura" !

P.S. : pichòta precision. Aicí, fasèm la diferença entre Cevenas e Lengadòc. Las Cevenas, entitat geoculturala (e non pas artifici administratiu) s'espandís sus los despartaments d'Avairon (ròde de "Sauclières", "St Jean du Bruel"), d'Erau (ròde de "Ganges") e mai que mai sus lo nòrd-oèst de Gard, lo sud-oèst d'Ardecha e lo sud-èst de Losera.

Se vos plai, mesclessiatz pas las consideracions administrativas e artificialas de 1790 emb de las regions geograficas adonc culturalas que representan una realitat umana !
E per aquesta rason, per nautres Cevenòus, parlessiatz pas pus de Losera, Ardecha, Gard, Gavaudan, Vivarés, Useja. Nòstra realitat, aquò's lo relèu, las dralhas d'estiva, lo clima e tot ce que buta sus nòstre sòu mai l'architectura paisana e religiosa. Tot aquò d'aquí bastís encara nòstra identitat e despuèi de sègles, seguessiam catolics, puèi iganauds e catolics, puèi roges e blancs !
Realitat reconeisseguda per nòstres pargues (1 nacionau mai 1 regionau). E de tot biais, tot lo monde çai se reconeis per "RAIÒL" o "RAIÒU" (aquel que demòra dinc los penjants e las vaus).
Au còntra, lo "Gavòt" (per lo Causse, la Marjarida) e lo "Pagèl" (per los Sucs) adonc demòran sus los plans e las chalms que se tròvan a 1000 mètres e mai.
Sèm una transicion entre Lengadòc-Provença e Auvèrnha, mès avèm una unitat de cultura e de lenga, segur !

Es per aquesta rason que la mapa de las entitats naturalas o culturalas que presentètz un jorn conten quauques detalhs dinc los contorns que sariáun de corregir, amai se dinc l'ensems, aquò's un brave e bòn travalh !