Aperaquí 4000 personas manifestèron dissabte per las carrièras de Baiona (Bas Ador), per reclamar la liberacion de las cinc personas arrestadas a Luhuso (Bascoat Nòrd) e perseguir lo procès de patz.
 
Demest los manifestants i aviá d’elegits, d’actors socials economics o  de simples ciutadans, recampats darrièr una bandeiròla ont se podiá legir, en basco e en francés, “del costat de la patz - libertat pels artisans de la patz”, çò rapòrta Mediabask.
 
Un desenat de tractors dobrissián lo cortègi, per mostrar lo sosten del mond agricòla. Darrièr, demest los elegits, i aviá lo cònsol màger de Baiona e qualques elegits ecologistas, socialistas e basquistas acompanhats dels representants del mond economic e social.
 
 
“Per cada persona arrestada de desenats prendràn lo relai per far avançar lo procès de patz”
 
Dins son messatge, la pòrtavotz de Bake Bidea (lo camin de la patz) remembrèt que “s’agís pas d’una operacion contra ÈTA, mas per empedir la societat civila de far avançar lo procès de patz”. E s’adressant als estats francés e espanhòl, lor diguèt: “non, avètz pas lo drech de nos enlevar lo drech a realizar aqueste procès de patz”, en tot ajustar que “per cada persona arrestada, desenant, de desenats prendràn la relèva per far avançar aquel procès”.
 
 
Las polícias francesa  e espanhòla arrèsta d’activistas que participavan al procès de destruccion de las armas
 
La Gàrdia Civila espanhòla, en collaboracion amb la DGSI francesa, arrestèt divendres de ser cinc personas e confisquèt una quantitat indeterminada d’armas e d’explosius a Luhuso (Bascoat Nord). E mai s’anoncièron que s’agís d’una operacion contra la logistica d’ÈTA, los detenguts èran d’activistas que participavan al procès de destruccion de las armas del grop armat basquista, qu’abandonèt la lucha armada en 2014 e dempuèi alavetz ensaja d’entamenar un procès de patz.
 
Demest los detenguts i a Jean-Noël Etcheverry, un militant ecologista per la non-violéncia; Michel Berhocoirigoin, una figura del sindicalisme agricòla e èx-president de la Cambra de Comèrci del Bascoat; e de Michel Tubiana, president d’onor de la Liga dels Dreches de l’Òme. Aquelas personalitats farián l’objècte d’una operacion policièra sul quite luòc ont procedissián a la destruccion d’una partida de l’arsenal d’ÈTA.