La Fondacion Musèu Etnologic dera Val d’Aran recebèt dimècres passat lo 4n prèmi Robèrt Lafont de la man del conselhièr de la cultura de la Generalitat de Catalonha, Santi Vila. Recebèt lo guierdon Ròsa M. Salgueiro, presidenta de la Fondacion Musèu Etnologic dera Val d’Aran, que foguèt creada en 1973 e que demest sas activitats cal soslinhar l’organizacion dels primièr concorses literaris en occitan en Aran, la publicacion de la revista Tèrra aranesa, e sa participacion màger en la creacion del Musèu dera Val d’Aran, que consagra una partida considerabla de l’exposicion a l’espaci lingüistic occitan. A travèrs de sa seccion Lengua Viua organiza cada an la corsa Aran per sa Lengua.
 
La remesa se faguèt a Barcelona e, en mai de Vila, i foguèron presents lo Sindic d’Aran, Carlos Barrera, e la directritz generala de la politica lingüistica, Ester Franquesa.
 
La serada, menada per la jornalista aranesa Ares Riu, comptèt amb las intervencions del president de Convergéncia Occitana, Joan-Francés Laffont; l’especialista en dreches lingüistics de l’Universitat de Barcelona, Eva Pons; e lo professor de lingüistica occitana de l’Universitat de Tolosa-Joan Jaurés, Patric Sauzet. Tanben i intervenguèron Las Mondinas e Alidé Sans.
 
Lo prèmi Robèrt Lafont,  instituit per la Generalitat de Catalonha en 2010, a la tòca de reconéisser de personas o d’entitats que se sián distinguits per la defensa, projeccion e promocion de la lenga occitana. Ongan es estada la quatrena edicion del prèmi, qu’es lo primièr còp que s’autreja a un collectiu. Los laureats de las autras annadas son estats Pèire Bèc, Felip Gardy e Jacme Taupiac.
 
La jurada de 2016, presidida pel conselhièr Vila, compren la directritz generala de la Politica Lingüistica, Ester Franquesa; lo director dels Servicis Territorials de la Cultura a Lhèida, Josep Borrell; lo Sindic d’Aran, Carlos Barrera, e lo president de l’Institut d’Estudis Araneses-Acadèmia Aranesa de la Lenga occitana, Jusèp Loís Sans.