Per melhor capitar una granda jornada de las finalas lo dimenge 3 de junh a Narbona, la Federacion a cambiat quasiment de tot en tot lo debanament de la segonda part de la sason en prevesent:
  La novetat de l’an serà tanben la participacion de Tolosa al Championship, lo segond nivèl europèu de XIII.
 
Los Dragons catalans an renovelat bravament lor efectiu per visar d’objectius mai bèls en Superliga a comptar del 11 de febrièr.
 
A la tardor, Occitania e Catalonha aculhiràn lo debanament del campionat del mond de 13 cadieràs.
 
E de la fin d’octòbre a la debuta de decembre, la Nòva Zelanda, Papoasia e Austràlia reçaupràn una novèla edicion de la Copa del Mond; ont los Blaus ensajaràn de se qualificar pels quarts de finala.
 
Mai que jamai, se poirà viure l’an novèl al ritme 13!
 
 
Los audencs en cap de fila
 
La fasa anar del campionat d’Elèit 1 se clavèt fa doas setmanas amb las tres formacions audencas en cap de fila.
 
Situacion logica per Lesinhan amb un efectiu bèl de jogaires confirmats. Situacion mai susprenenta per Carcassona que jòga sens estrangièr e fa fisança als joves. Lo campion Limós ten sa plaça amb seriós. Los Dragons-U-23 prepausan un jòc dinamic, mas se sap pas se un esperit de grop pòt far anar de l’abans una formacion resèrva.
 
Avinhon ensaja de seguir lo ritme, intractable a Sant Ruf. Son los sols per l’ora a aver batut Lesinhan.
 
Albi se posiciona per la seisena plaça qualificativa per las fasas finalas. Sent Gaudenç fa conscienciosament sas classas e a signat una victòria espantanta a Sant Estève. Vilanòva s’apièja tanben sus una formacion jove: aquò finirà que pagarà. Mai complicat per Palau qu’esperava mai amb l’Olivièr Elimà coma cap de fila. Enfin, los Bròncos mancan d’ambicion e semblan aquí per la sola necessitat qu’a Tolosa d’aver una formacion en campionat Elèit per anar jogar en Championship.
 
 
XIII al femenin
 
Lo campionat d’Elèit 1 femenin començarà en aquesta debuta de genièr amb dimenge 8 de genièr los rescontres L’Escura-Carcassona, Tolosa Ovalia-St Estève/13 Catalan e Biganòs-Marselha.
 
 
 
 
Alan Roch

 

	Lo planchòt fòl (cronica occitana dins lo n° de decembre de 2016 de XIII-Magazine)   L’autre còp, a Carcassona, s’inventèt l’ensag a 14 punts!!! La responsabla del tablèu de marca electronica despassèt los 4 punts oficials, ensagèt de tornar enrè, mas la maquina contunhèt de montar, montar... fins a 14 punts l’ensag!   Lo còp d’abans, a Lesinhan, es lo cronomètre del tablèu electronic que virèt canturla e se dissocièt del temps real de la partida.   E visca la modernitat! Aquesta besonha bèla (que cada còp se vei lo -o la- responsable trastejar un moment abans de la lançar), probable que los conceptors (coma tròp sovent) prenguèron pas en compte las realitats d’una partida e dels problèmas que pòdon advenir: moment d’inatencion o d’exaltacion, arbitre que càmbia de decision, interrupcion imprevista de la partida, ...   Cal plan constatar que lo planchòt electronic per rapòrt al planchòt uman es coma lo remplaçament de las pendulas d'agulhas pel quartz dins las garas: una marca de la desumanizacion de la societat.   Se nos podiatz tornar la cabana o lo panèu (amb una escala per arribar a la marca), amb sas chifras gròssas, e lo responsable de la marca (qu’èra pas totjorn lo primièr en calcul) seriá plan: un retorn del viscut sensible!   Bon, lo mestièr èra ça que la plan dangeirós, coma ba ditz la cançon:   “Un jorn, lo tipe de la marca Panèt vint punts als catalans. Dempuèi chuca farinetas Son rastelièr es a Perpinhan”.