Mai d’un quarantenat de vilas an fach la 20a Dictada Occitana
De remarcar ongan l'enòrma participacion d'escolans a Albi e l’estrambòrd de Barcelona, ont lo CAÒC recebèt l’aculhença e lo sosten de la Generalitat de Catalonha
Albi | Centre Cultural Occitan d’Albigés
La 20a edicion de la Dictada Occitana s’es convocada ongan dins mai d’un quarantenat de vilas de pertot dins lo país e tanben a París e als Païses Catalans. La majoritat de las convocacions d’aquel concors ortografic de la lenga occitana se debanèron simultanèament dissabte passat amb una participacion plan nombrosa.
La Dictada nasquèt en 1998 d’una iniciativa del Centre Occitan de Castras (Castrés) e d’an en an d’autras municipalitats an jongut l’eveniment.
208 personas a Albi, mai que mai d’escolans e de collegians
A Albi, la dictada se debanèt divendres passat. Lo Centre Cultural Occitan d’Albigés organizèt l’eveniment aquel jorn per permetre la participacion de las classas, e atenguèt la participacion d'ochanta uèch collegians de Calandreta, e de cent escolans d'escòlas bilingüas e de collègis publics. En mai d’aquò, participèron un licean e dètz e nòu adultes.
Lor organizaires grandmercejan los professors, los caps d’establiments e la conselhièra pedagogica d'aver permés aquel recampament intergeneracional.
Estrambòrd a Barcelona
De remarcar ongan l’estrambòrd de Barcelona, ont i participèt un ochantenat de personas. Aquí l’eveniment l’organiza lo Comitat d’Afrairament Occitano-Catalan (CAÒC) e foguèt aculhit per la Generalitat de Catalonha. Dins aquel sens, la dictada tenguèt la preséncia de la directritz generala de la politica lingüística, Ester Franquesa; lo cap dels afars occitans, Xavier Moral; lo cap dels servicis lingüistics dels mèdias publics catalans, Ernest Rusinés, e lo cap del Servici d’Immersion e d’Acuèlh Lingüistic de Catalonha, Pere Mayans.
Los participaires escotèron per videoconferéncia una saludacion del Centre Occitan de Castras, de la man de Bernat Vernhièras, que pus tard legiguèt lo tèxt de la dictada. Puèi, dos professors d’occitan del CAÒC tornèron legir lo tèxt.
La dictada finida, una jurada compausada pels professors e pels ensenhaires d’occitan faguèt la correccion dels trabalhs dels participants. Après la dictada, los participants poguèron gaudir d’un vespralh. A la seguida, lo cantaire Joan Codina, membre del grop de musica Mirabel, faguèt un concèrt de cançon e de musica occitanas.
Los laureats de Barcelona obtenon una borsa per participar a l’Escòla Occitana d’Estiu, que se debana cada an a Vilanuèva d’Òlt (Naut Agenés) durant la tresena setmana d’agost.
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
I'avia una Dictaa Occitana a Gap perèu. Fai d'ans que Lo Rescontre Gapian e l'I.E.O. 04-05 fan una Dictaa a Gap, duberta a tots (pichons e adultes).
Mercé de l'apondre dins vòstra tiera (es ja marcaa dins la tiera de l'IEO de Castras).
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Visca l'occitan e visca las culturas de tot lo mond !
Adieu,
I'avia una Dictaa Occitana a Gap perèu. Fai d'ans que Lo Rescontre Gapian e l'I.E.O. 04-05 fan una Dictaa a Gap, duberta a tots (pichons e adultes).
Mercé de l'apondre dins vòstra tiera (es ja marcaa dins la tiera de l'IEO de Castras).
Mai d'entresenhas: www.espaci-occitan.com
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari