Los liceans limosencs participèron a aquel recampament amb l'objectiu de "rescontrar d'autres escolans qu'aprenon e que parlan la nòstra lenga, çò que foguèt una capitada perque èrem 186 joves amb los lors professors".

 

Pendent las jornadas participèron a de talhièrs de cultura occitana en aprenent, entre causas autras, a cosinar las aurelhetas, "las trufas a la clocheta" o la tapenada. Faguèron d'espòrt amb la petanca, lo pilo, lo rugbi, la passejada o la corsa d'orientacion. E mai i aviá la possibilitat de far de talhièrs mai artistics coma las danças tradicionalas occitanas, lo cant, la fotografia, lo dessenh, eca.

 

Una autre objectiu del viatge èra lo de descubrir lo parçan, çò que se passèt plan amb torn de batèu per conéisser lo litoral d'Agde e amb la visita al musèu de l'Efèb.

 

Rapòrtan los liceans que çò qu'an plan aimat es l'ambient e l'esperit d'aquel viatge, un esperit festiu e convivial: "èra plan de viure amb d'autres joves que coneisson la lenga".

 

Los escolans del licèu Jacques Ruffié de Limós son prèstes, doncas, a tornar partir l'an que ven al recampament 2013.