Lo govèrn d’Estònia a anonciat un plan dins lo qual lo país baltic vendrà lo pus descentralizat del Mond. Las institucions de l’estat qu’ara son dins la capitala, Tallinn, seràn transferidas dins las dètz e uèch vilas principalas del país, totalament o almens parcialament. Aital, lo govèrn estonian vòl evitar que l’estat siá percebut coma una entitat centralizaira. Dins aquel sens, se distribuirà tanben per tot lo país las ressorsas e los emplecs. La decision finala deu èsser discutida pel parlament e a generat una cèrta controvèrsia, mas la maqueta de l’operacion es fòrça detalhada e tot fa pensar que, e mai s’es modificada, se’n mantendrà la partida fondamentala.
 
 
Dètz e sèt vilas recebrián d'institucions de l’estat qu’a l‘ora d’ara son a Tallinn, se lo plan reüssís. Seràn totas las capitalas de província e las vilas pus grandas de las doas illas principalas.
 
Segon lo primièr projècte presentat pel govèrn, a Kuressaare s’establirà la lotariá
nacionala, a Kardla l’agéncia de las doanas e dels impòstes, a Haapsalu l’institut nacional de la santat, a Paldiski la part pus granda de l’armada, a Pärnu las institucions de contraròtle del transit ferroviari e terrèstre, a Rapla las autoritats de la concurréncia, lo burèu dels brevets e lo de proteccion de las donadas e dels consumaires, a Viljandi los servicis estatistics de l’estat e lo musèu nacional, a Paide los servicis tecnics de la seguretat sociala, a Tapa la centrala dels camins de fèrre, a Valga totes los servicis restacats a l’environament, a Jõgeva los servicis veterinaris e de l’alimentacion, a Rakvere los servicis geologics e d’entrepresa, a Võru l'inspeccion de l’environament, a Põlva la gestion forestièra, a Jõhvi lo ministèri de la justícia e qualques entrepresas publicas e a Narva l’acadèmia de la seguretat e las institucions de contraròtle de l’emigracion. Tartu, la segonda vila del país, recebrà un ensems d’institucions de divèrses ministèris.
 
L’especializacion de cada vila a un rapòrt amb las ressorsas o las situacions localas. Per exemple, Narva gerirà l’emigracion perque es lo ponch principal d’intrada d’emigrants, la gestion forestièra s’establirà a Põlva, qu'es la region amb mai de bòsques del país, e lo transit ferroviari se dirigirà de Pärnu estant perque serà lo ponch d’intrada al país de la linha baltica de nauta velocitat.
 
A las criticas per la possibla complexitat del sistèma an respondut amb l’argument que lo govèrn estonian es un dels pus telematics del Mond e per aquela rason requerís practicament pas cap de gestion personala. Lo govèrn defend que l’estat es la primièra entrepresa del país e qu'es logic que contribuisca a la riquesa de totas las regions e non pas solament de la capitala.
 
 

Fònt: VilaWeb