La primièra ministra britanica, Theresa May, estonèt ièr totòm en convocant d’eleccions legislativas anticipadas l’8 de junh que ven. En plen procès de sortida de l’Union Europèa, May a convocat lo vòte perque, segon ela, “cal d’estabilitat e una direccion eficaça”. Per tal de menar a bon tèrme lo Brexit, “i deuriá aver d’unitat a Westminster, mas n’i a pas”, çò diguèt.
 
Per poder avançar las eleccions, May a besonh del sosten de dos tèrces de la Cambra dels Comuns, e sembla que l’aurà. Los trabalhistas an anonciat que sostenon sa convocacion.
 
Los Liberals Democratas an reagit amb un comunicat en afirmant que “los trabalhistas ganharàn pas cap de sèti suls conservators”, e se presentan coma los sols capables de “prevenir una majoritat conservatritz”, e doncas d’evitar que Theresa May atenga una majoritat que li permeta de menar de politicas pus duras.
 

We need an election now to secure the strong, stable leadership the country needs to see us through Brexit & beyond. https://t.co/8jhvoAcLuR

— Theresa May (@theresa_may) 18 d’abril de 2017

 
 
Sturgeon: “Alcem-nos per Escòcia!”
 
De son costat, la primièra ministra escocesa, Nicola Sturgeon, faguèt de declaracions fòrça criticas amb las intencions de May. “Los tories veson l’oportunitat de mòure lo Reialme Unit devèrs la drecha, de forçar un Brexit dur e d’impausar de retalhadas mai prigondas. Alcem-nos per Escòcia!”
 
De fach, l’eleccion pòt èsser una escasença pel pòble d’Escòcia, mai que mai se l’eleccion deven un sondatge sus l’independéncia.
 

The Tories see a chance to move the UK to the right, force through a hard Brexit and impose deeper cuts. Let's stand up for Scotland. #GE17

— Nicola Sturgeon (@NicolaSturgeon) 18 d’abril de 2017

 
 
May cercariá d’enfortir sa direccion del Brexit
 
Segon una analisi de Vicent Partal, Theresa May cèrca d’enfortir e de legitimar sa direccion e son biais de comprene e de menar a bon pòrt lo Brexit. D’efièch, los sondatges assolidan que May ganhariá clarament.