Èm au mes d’octobre, ja avem jogat ueit jornadas e podem véder lo classament préner forma.

Grenòble 28-23 Perpinhan (BD)
 
La bona suspresa, es lo bon comportament de Grenòble. La soa victòria contra Perpinhan n’es la pròva. Èra la partida tracanard. Los arpitans s’en son plan sortits contra una esquipa catalana venguda cercar los punts perduts a casa contra Tolon. Marquèren l’ensai de la victòria a dus minutas de la fin. S’arretroban a la 5au pausicion deu classament çò qu’es logic.
 
Perpinhan pòt har dòu ne pas préner mei de punts mès sus las 8 purmèiras jornadas alternèren lo bon e lo mensh bon e lo resultat de dissabte es plan representatiu deu comportament catalan. Ne cau pas desbrombar los chepics de santat deus pielars en particular de Nicolas Mas.
 
 
Lo Mont (BD) 28-30 Estadi Francés
 
Lo començament de sason deus landés es mei que mau aisit. Serà complicat per eths de ne pas tornar en Pro D2 a la fin de la sason. Un còp de mei an tot ensajat contra los parisencs. Son tornats au plachòt, marquèren lo solet ensai de la partida. Mès de l’aute costat, lo tustaire Porical marquèt trenta punts au pè. Es la quatau des·hèita a casa peus landés. Cau tanben véder qu’adara las esquipas se deplaçaràn en país landés per ganhar. Las esquipas qui perderàn au Mont que, sia peu haut o baish deu classament, haseràn una maishanta operacion que pòt costar una qualificacion o una davarada en fin de sason. Mès bon, èm segurs, los landés jogaràn totas las partidas dinc a la fin per ganhar e benlhèu realizar l’impossible.
 
 
Racing (BD) 12-16 Montpelhièr
 
Èra la partida on podèvam esperar véder hòrt de jòc enter duas còlas simpaticas a véder jogar aquera sason. Mès las condicions climaticas decideren de tot cambiar. La partida se joguèt devath la ploja. Los montpelhierencs saburen s’adaptar lo mei a las condicions, marquèren un ensai en contra a l’òra de jòc.
 
Montpelhièr fit la bona operacion de la setmana, s’arretroba a una quatau plaça hòrt logica darrèir los tres favoris. Los racingmen s’inclinèren per 2au còp a casa.
 
 
Castras 16-13 Clarmont (BD)
 
Tot se joguèt dens las darrèiras minutas. A la tempsada i avèva un 3 a 6 peus clarmontés. Mès en 2au tempsada chic a chic los castrés priren lo mielhor dens lo jòc. Mès ad aqueth nivèu tots los detalhs son importants e sus una beròia accion de Castras a cinc mètres de la linha jauna e blua una maishanta passa permit a Jean Marcelin Buttin de marcar un ensai clarmontés dab una corrada de cent mètres. Mès los castrés n’arrestèren pas de jogar e l’ensai de Kockott permit aus castrés de tornar au planchòt. La penalitat de Teulet a quate minutas de la fin recompensèt lo bèth tribalh de tota l’esquipa castresa.
 
 
Biàrritz 9-36 Tolon (BO)
 
5au victòria a l’exterior en 6 desplaçaments. Que díser de mei? Lo resultat es logic dab una dominacion de tots los moments dab l’acceleracion au bon moment per sortir los bascos de la partida e préner lo bonus ofensiu. Aquera victòria pòt har pensar au resultat deus tolosencs a Baiona hè quinze jorns. Podem véder la diferéncia enter las duas o tres esquipas deu haut deu classament e las esquipas metjanas. D’autas esquipas s’espataflaràn a casa contra Tolon o Tolosa
 
 
Bègla-Bordèu (BD) 32-34 Tolosa
 
Una sason pòt cambiar per pas grana causa. Uei los girondins son en pausicion per davarar en Pro D2 çò qu’ei ilogic mes lo rugbi es hèit atau.
 
Vengut dab una còla 1 bis los tolosencs furen dominats la purmèira òra de jòc dab tres ensais bordalés. Mes chic a chic los tolosencs tornèren au plachòt. Las detz darrèiras furen d’una intensitat increïbla. A la 76au minuta, Camille Lopez pensava aufrir 4 punts a la soa còp dab una penalitat. Mès Tolosa joguèt dinc a la fin e seis minutas apuèi la sonada, l’arbitre èra dens l’obligacion de shiular un ensai de penalaitat apuèi una seguida de mescladas jogadas a 8 contra 6 a 5 mètres de la linha girondina.
 
 
Baiona 37-16 Agen
 
Es la dusau victòria de tira peus baionés e la purmèira des·hèita peus agenés apuèi tres victòrias consecutivas. Agen joguèt plan e lo 18 a 13 a la tempsada èra logic pr’amor que i avèva una dominacion baionesa mès los agenés profietèren las pecas baionesas. Chic a chic en 2au tempsada, Baiona marquèt de navèras penalitats per sortir Agen deu bonus ofensiu. A la 70au minuta, Garcia aplatit lo purmèir ensai de la sason a casa deus baionés.
 
 

1	Tolon	32	8	7	0	1	84
2	Tolosa	28	8	6	0	2	100
3	Clarmont	28	8	6	0	2	57
4	Montpellhièr	23	8	5	0	3	-1
5	Grenòble	22	8	5	0	3	32
6	Castras	20	8	4	1	3	27
7	Biàrritz	19	8	4	0	4	11
8	Racing-Métro 92	19	8	4	0	4	2
9	Perpinhan	16	8	3	0	5	-19
10	Estadi Francés	15	8	3	1	4	-10
11	Baiona	15	8	3	0	5	-34
12	Agen	14	8	3	0	5	-75
13	Bègla- Bordèu	11	8	2	0	6	-44
14	Lo Mont	1	8	0	0	8	-133

 
 
 
Pro D2: Purmèira des.hèita de la sason per Oyonnax
 
Carcassona 25-21 Oyonnax
Ais de Provença 16-20 Tarba
Albi 25-19 Orlhac
Briva 16-11 Aush
Besièrs 16-19 Pau
Dacs 44-10 Massy
Colomièrs 25-30
Narbona 22-19 La Ròchela
Lion 36-16 Narbona
 
 

1	Oyonnax	21	6	4	1	1	158	90	68
2	Lion	20	6	4	1	1	194	112	82
3	Tarba	19	6	4	1	1	157	139	18
4	Orlhac	17	6	4	0	2	172	141	31
5	Pau	17	6	4	0	2	120	123	-3
6	Albi	17	6	4	0	2	141	154	-13
7	Carcassona	16	6	3	0	3	174	141	33
8	La Ròchela	15	6	3	0	3	126	103	23
9	Briva	15	6	3	1	2	120	127	-7
10	Aush	13	6	3	0	3	117	138	-21
11	Colomièrs	11	6	2	0	4	127	157	-30
12	Narbona	10	6	2	0	4	110	138	-28
13	Besièrs	10	6	2	0	4	128	177	-49
14	Massy	9	6	2	0	4	130	186	-56
15	Ais de Provença	8	6	1	0	5	130	154	-24
16	Dacs	7	6	1	0	5	118	142	-24

 
 
 

Eric Goyhenne