Lo pòrtavotz del Partit dels Trabalhadors de Curdistan (PKK), Duran Kalkan, a manifestat l’oposicion al referendum d’independéncia convocat pel govèrn del Curdistan Meridional, lo Curdistan qu’es dins l’estat iraquian. Lo referendum es convocat pel 25 de setembre que ven. Kalkan a dich que la convocacion èra solament un acte de “propaganda” e que lo pòble curd aviá pas besonh de nat estat. Dempuèi mai d’un decenni, lo PKK vòl l'independéncia de Curdistan, mas segon lo “confederalisme democratic” prepausat pel cap istoric del partit, Abdullah Öcalan, embarrat dins una preson de Turquia dempuèi 1999.
 
En abril, lo govèrn del Curdistan Meridional aprovèt de convocar ongan un referendum d’independéncia d’Iraq. Prèviament s’èran amassats a Pirmam los dirigents dels dos principals partits de la region: l'Union Patriotica de Curdistan (UPK) e lo Partit Democratic de Kurdistan (PDK).
 
Fa qualques setmanas, lo govèrn del Curdistan Meridional confirmèt que se reportariá pas la data del referendum. Es atal que respondiá a la demanda del secretari d’estat estatsunidenc Rex Tillerson, qu'aviá exprimit la preocupacion dels Estats Units que lo referendum poguèsse distraire los curds de la lucha contra l’autoproclamat Estat Islamic.
 
Lo Curdistan Meridional, dins lo nòrd d’Iraq, es una region autonòma, e de facto independenta dempuèi la guèrra d’Iraq de 1991. Ten son armada pròpria —los peshmèrgas— e es una de las quatre regions istoricas de Curdistan, amb las que dependon dels estats turc, iranian e sirian.