Coma cada an a l’entorn de Pascas, torna Pyrenades, lo festenal aranés del pireneïsme, qu’ongan se debanarà del 24 al 31 de març, totjorn a Salardú.
 
Es ja l’8n an que lo Musèu del Pireneïsme prepausa aqueste festenal, qu’ongan presenta un programa vast ont cal soslinhar de conferéncias, d’obradors pels pichons e pels adultes, d’excursions, de cinèma e de musica de montanha.
 
Lo festenal lo clavarà un concèrt d’Alidé Sans e Paulin Cortial que presentaràn lor darrièr disc Henerècla. 
 
 
Debat sus la lenga e l'identitat
 
La cultura e la lenga del país seràn tanben presentas al programa que culminarà amb un debat entitolat “Er aranès, qui ten era lengua ten era sua identitat”.
 
 
8a Mòstra de Cinèma de Montanha
 
L’8a Mòstra de Cinèma de Montanha projectarà un filme cada ser sus la vida en montanha, segon una seleccion dels melhors filmes mostrats dins lo Festenal Internacional de Cinèma de Montanha de Torelló. De soslinhar lo filme Més enllà del Kumbhakarma realizat per Òscar Cadiach i Puig, lo primièr catalan qu’arribèt a la cima del Chomolungma, la montanha pus nauta del Mond. Dins lo filme, lo quite Cadiach explica l’istòria del primièr shèrpa que pogèt las 14 cimas de mai de 8000 mètres. Ongan tanben se poirà descobrir l’experiéncia 360º de realitat virtuala amb la Real 3D-VR Experience.
 
 
Lo pireneïsme
 
“Caminar, sentir e escriure”: es aital qu’Henri Beraldi definiguèt lo concèpte de pireneïsme. Los pireneïstas èran los que favoriguèron la naissença del torisme dins aquelas montanhas amb un esperit aventurièr, naturalista e umanista. Amb lo programa d’ongan, l’organizacion del festenal cèrca de reïnterpretar lo legat dels primièrs pireneïstas per lo far reviure.
 
La volontat del festenal es tanben de dinamizar la vila de Salardú amb una proposicion de qualitat que la sostenon l’Ajuntament de Naut Aran, lo Conselh General d’Aran e d’autras collectivitats.