L’anciana basa aeriana de Tolosa Hranccasau aculhís ara lo centre d’ensag Hyperloop Transportation Technologies, la societat estatsunidenca qu’aculhís lo tren del futur. Un mejan de transpòrt public que superarà los 1100 km/h gràcias a una tecnologia revolucionària que propulsa lo tren amb la fòrça magnetica de grands aimants.

Los trabalhs d’amainatjament comencèron a la fin de febrièr. Èran comandats per una còla estatsunidenca, qu'ara, al començament de març, l'a relevada una còla operacionala d'uèch personas, çò rapòrtaLa Dépêche.

Lo sit de Hranccasau aculhís dos projèctes d'Hyperloop. D’un latz, la realizacion d’una pista d’ensag provisòria de 320 mètres de long que serà operacionala a la fin de 2018; puèi, a comptar de novembre que ven, se bastirà una pista d’un quilomètre montada sus de pilons de près de sièis mètres de nautor.

Lo sit ten lo sosten de l’estat, de la comuna de Cunhaus e de Tolosa Metropòli, qu’assegurarà tanben la fasa de despollucion quimica e pirotecnica.

Hyperloop, qu’es aquò?

L’Hyperloop es un tren de levitacion magnetica que despassa los 310 km/h. Propulsat per la fòrça d’aimants, atenguèt en agost passat los 310 km/h dins son segond ensag realizat a Las Vegas, una chifra espectaclosa mas encara luènh de l’objectiu dels 1100 km/h previstes per la version finala d’Hyperloop One. 

Hyperloop es promogut per Elon Musk, fondador de la societat Space X e de las veituras electricas Tesla.