Opinion
La granda pachaca
Dins la situacion politica de l’ora d’ara en França, una gata i tornariá pas trapar sos pichons. Quand aquesta cronica pareisserà, s’i veirà benlèu mai clar amb la dobertura de la sesilha de l’Amassada nacionala.
Lo còp de mèstre de la dissolucion —clarificacion del President— reial mena à un fosc mai fosc que las brumas d’Anglatèrra ont las eleccions an balhat una majoritat clara als trabalhistas (pels trabalhaires, es quicòm mai!).
Lo segond torn de las legislativas a plan mostrat que 2/3 dels franceses vòlon pas balhar la direccion del país a l’extrèma-dreita e a sos candidats e sas candidatas del tancament sus se, del refús dels autres, del racisme, de l’omofobia, del climato-escepticisme e ne passi. Lo malastre es que capitan d’amassar voses quitament sens faire campanha! Una fotografia de la Marina e de l’Atlàs-campion de geografia Bardelà sufison per emplenar las urnas e respondre als vòts de la premsa propagandista d’unes capitalistas-formataires de l’opinion.
Lo còr nos dòl de veire tota la cordelada d’elegits RN long de las costièras de la Mar nòstra de Port-Bou à Menton.
Los progressistas avèm plan ensajat —e capitat— de faire barratge al RN: aprèp los desistaments, 7 electors sus 10 d’esquèrra an acceptat de votar pels macronistas o la dreita republicana. Aquò a degut costar a un-a socialista, un-a comunista, un-a ecologista, un-a LFI de votar per Darmanin o Elisabèt Bòrne, mas l’an fait!
La reciprocitat es mendra dins l’autre sens: 4 macronistas sus 10 votèren per l’esquèrra . Votar blanc èra pas faire barratge, mas just una freula paissièra.
Reconeissença per aver salvada la Republica: res. O la non-reconeissença de la plaça primièra del Novèl Front Popular. O lo desir de faire virar socialistas e ecologistas cap al centre. Sens parlar de l’escomenge cap a LFI que se complai dins aquela posicion. Aquò promet!
Saludarem l’eleccion en Canaquia del filh del Joan-Maria Tjibaou. França ne deu arrestar amb sas politicas colonialistas al defòra e al dedins.
D’aquel temps, lo president Biden sap pas mai se sèm en 2020 o en 2024 e confond Zelensky e Poutine. Dins las familhas ont lo papeta desbarruta, òm estimariá qu’es temps de li trapar una plaça a l’ospici. Pensi pas que l’Ostal Blanc siague un establiment pels papetas de la memòria trantalhanta, nimai pels capbords dels pelses en tufet.
Lo factor ven de passar: benlèu qu’aurai una letra novèla del Président de la Republica.
Dissolgut Roch
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
I a longtemps que lo monde vesan que l'esquerra es qu'una pala imitacion de çò qu'era. L'òm la pas vist sostenar los gilets jaunes, ni las manifestacions daus paisans ni denonçar la vaccinacion.
L'òm torna votar mas l'òm pren toptjorn los mesmes coma Olanda que vai cumular una paia de retirat de la presidença e una paia de deputats.
La vertat, quò es que la politica francesa exista plus tant chau obeir a l'Euròpe qu'a tornat elegit Van der Lieden a la testa de la comission europeenna e que vòl bastir una defensa militaria europeena que servira a reprimar los pais europeens que se virarian contre l'empire. E tot aquò au servici de la politica daus poderos que volan una dictatura entiera
De mai França vai esser leu sos contòli dau FMI per deriva budgetaria.
Si las gens d'esquerra volan pas veire aquò, i aura pus degun per esser d'esquerra.
La Resistança Francesa s'organisa . Apelatz zo coma voldretz mas segur qu'aniran pas querrer l'esquerra que prenan coma un traïson. França a tot perdut, son economia, sa libertat d'accion. En segant aquela politica europeena l'occitanisme perdra tot. Mielhs vòl reclamar a França doas istòrias oficialas, l'una per los qu'an ganhats coma Clovis, karlemanha, los reis de França, los jacobins e una segonda istòria de França per los qu'an perdeguts.
Sem una chata; tòrnam trobar nòstres petits.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari