Parlarem ren de las revistas especializaias pontualas en lingüistica o eraldica o autre.

Sabèm qu’en França, las publicacions francesas de lenga occitana son limitais dins lors ajuas per d’astúcias juridicas coma lo sosten a la premsa en lenga... francesa.

Per astre las regions sostenon çai e lai.

“Las tres vièlhas”, expression de Sèrgi Viaule, tenon lo còup. Son de revistas literàrias centenàrias: Reclams basaia en Bearn, Òc basaia segon a Moans Sartòu o a maison dal cap redactor e Gai Saber basaia a Tolosa. Son de revistas que los contributors venon quasi de’n pertot.

Mas lo demai?

Ousitanio vivo, revista politica occitana dal Pimont occitan, revista dal Moviment autonomista occitan a l’origina, publica plus que sus internet.

La Chambra d’Òc, totjorn en lo Pimont occitan, a ela una revista que mandan per mail sonaia Nòvas d’Occitània. Parlan de tot, son basats a Ròcabruna.

La Setmana e mai Plumalhon e Papagai an cessats. Èran basats en Bearn mas de tots dialèctes.

Anem occitans, a quitat de paréisser, per lo moment. Es la revista de l’Institut d’estudis occitans nacional.

Rèstan Aquò d’aquí, País gascons (editat per Per Noste). Lo Diari jornal a la basa de L’IEO Occitanie Pyrénées Méditerranée, basaia a Tolosa, mas que sembla de fach la remplaçar. Vist l’espandi geografic dals contributors.

Occitània la revista politica, dal Partit occitan, se tanquèt fa tres meses.

Rèsta lo Cebier amb Gerard Tautil per la branca provençala e alpenca dal PÒc.

Lo Lugarn es de fach la soleta revista panoccitana politica restanta, revista dal Partit de la Nacion Occitana.

L’avenir economic de Jornalet.com es complicat, complicacions per lo “modèl economic”, valent a dire trabalh a gratis de Ferriòl. Subvencions de la Generalitat de Catalonha, ajuas via l’associacion Los amics de Jornalet coma autras sorsas economicas principalas.

Senon dal costat d’autras revistas avèm Lou Felibrige: la revisto e polèm ren las citar totas. E d’autras revistas a tòca mai regionala o despartimentala o locala coma Prouvènço arò en occitan provençal rodanenc principalament, Ou païs mentounasc en occitan vivaroalpenc mentonasc principalament, Lou Sourgentin en occitan de Niça, Lo Bornat dau Perigòrd, o de revistas mai educativas coma La Tarasc@ per los ensenhaires d’Occitan de l’Acadèmia de Marselha - Ais.

Rentrarem ren de mai dins lo detalh de revistas que n’i a un fum e avèm volgut desvelopar que las qu’an una tòca pan occitana o quasi. Avèm ren los mejans de saber se Bizà neïrà o d’autras totjorn localas contunhan o non. O diretz en comentaris.

Cal tenir per editar un jornal en occitan, un camin de lònga corsa.