Après la guèrra personala de Salvini contra los migrants e los refugiats, e las divèrsas declaracions racistas, sexistas e omofòbas de divèrses membres del govèrn,  l'atac contra los dreches de las femnas ven la cerièra sus la còca. Las associacions feministas del país an paur que los cambiaments legals del nòu govèrn populista ajan de consequéncias grèvas sus las victimas de la violéncia masclista. Lo nòu govèrn de coalicion entre lo populista Movement Cinc Estelas (M5E) e l’extrèma drecha de la Liga prepara de mesuras per combatre lo “grèu fenomèn de l’alienacion parentala” del temps que se debat una lei contra “las concessions e las batalhas ideologicas feministas contra los òmes”, coneguda popularament coma Lei Pillon.
 
En mai d'aquò, lo ministre de la familha, Lorenzo Fontana, afirmèt que las familhas formadas per d’omosexuals existisson pas e que trabalhariá per descoratjar los avortaments. D’efièch, prevei de politicas que favorizen la fertilitat e la natalitat e de condemnas de preson per assassinat per las femnas qu'interromprián lor emprenhament non desirat.
 
Enfin, arriba en Itàlia un periòde de sofrença per las personas que serián pas d'òmes blancs, italians e eterosexuals, e crenhem qu'aqueste còp l'Union Europèa intervenga pas. E saique se l'UE foguèsse pas intervenguda l'an passat per la nominacion de tres primièrs ministres non elegits per las urnas, ara l'antieuropeïsme auriá pas desvelhat lo mostre del faissisme. Mas sembla que per l'UE actuala l'estabilitat economica val mai que totes los dreches umans.